BILINGUA

Dieta da rait a Surava

La segunda dieta BILINGUA è stada cumplettamain sut l’ensaina da la rait e dal barat. Las participantas ed ils participants han emprendì d’enconuscher la lingua sco bain vivent e social. En ina maschaida variada da moviment, storytelling, experientscha en la natira e cuschinar cuminaivel hai dà spazis per barat, inspiraziun e scuntrada autentica. En il center èn stadas la plurilinguitad, la cooperaziun e la colliaziun – lunsch davent da formats classics da dietas. Uschia è l’emprender daventà in eveniment cuminaivel.

La dieta da rait è stada la finiziun d’in project da trais onns per incumbensa da l’Uffizi per la scola populara ed il sport (USS) dal Grischun. La finamira da quest project è stada da sustegnair scolas e classas bilinguas en il chantun cun purschidas da furmaziun supplementara, cun cussegliaziuns didacticas e cun installar sistematicamain ina rait.

Suenter il bainvegni pluriling ha gia la via cuminaivla da la staziun da Surava al lieu da l’occurrenza dà l’occasiun ad emprims discurs ed inscunters. Ladina Seraina Ziani ha alura dà impuls professiunals cun in referat da silenzi en la natira. Da cumbinar il moviment, la reflexiun ed il barat da cuntegns ha animà discussiuns davart l’emprender e l’instruir en contexts plurilings. Ils discurs e las scuntradas durant la dieta han mussà a moda impressiunanta la valur dal barat regular. Sper ils concepts d’instrucziun ed ils materials didactics contribueschan oravant tut il barat d’experientschas, la reflexiun communabla e la collavuraziun tranter las scolas fermamain da garantir la qualitad e da sviluppar vinavant la furmaziun bilingua.

Durant ils ultims trais onns èn stadas participadas 13 scolas da tut las regiuns dal Grischun a quest project. Ils elements centrals dal project èn stads furmaziuns supplementaras en il team, furmaziuns supplementaras individualas, cussegliaziuns didacticas sco er il svilup d’ina rait chantunala. Ils contacts e las cooperaziuns ch’èn sa resultads en il rom da quest project èn ina basa impurtanta per l’ulteriur svilup da la furmaziun bilingua en il chantun Grischun.