Bewegung, 1983

Il cumplex d’edifizis da la SAP dal Grischun ha l’architect cumpareglià ina giada cun «grips en la bova» – in maletg che renviescha a la cuntrada oriunda dal quartier Loë: ina gonda furmada da bovas che sa mova cuntinuadamain. Quest maletg da la materia en transfurmaziun è in punct da referiment conceptual per la pictura murala da Madlaina Demarmels en il foyer da l’edifizi principal.

L’ovra mussa ina creaziun abstracta d’elements nairs e grischs argientads che sa collian in cun l’auter da maniera angulara e rumpan la surfatscha da la paraid. Malgrà l’abstracziun dat la furma in’impressiun da corporalitad, bunamain figurativa cun chau e bist. Lingias alvas e tocs singuls rinforzan l’effect dinamic da l’object che sa mova ensi da maniera diagonala sin in funs cler blau.

En il context da la scol’auta pon ins era leger la lavur da maniera simbolica: sco process per cumenzar, per sa divider e per avanzar. La sfessa stretga e cotschna en il center dal maletg regorda en quest connex tant ad ina violaziun sco ad ina glischur interna. L’emprender cumpara qua sco via pretensiusa che custa forza e che liberescha il medem mument l’energia che pussibilitescha moviment e svilup. (NR)