Adriana Grass-Marques

Quader avert, 1983 Incrustaziun, crap da chaltschina

Madlaina Demarmels

Moviment, 1983 Pictura, acril sin paraid faudabla

Laura Weidacher Buchli

WEG, 1984 Bassin d'aua

Leta Peer

Tripticon, 1994 Serigrafia sin metal

Lydia Wilhelm

Pensari, 2010 Dissegn da paraid, grafit en vernisch

Patricia Jegher

Sendas, 1994 Motivs sablunads sin vaider

Architectura ed art sco unitad
Art en l'architectura

L’edifizi da la SAPGR dovra art! – ha ditg l’architect Robert Obrist (1937-2018). Questa chapientscha da l’architectura e da l’art sco unitad ha el realisà 1983 tar la construcziun da la Scola auta da pedagogia dal Grischun ch’aveva da lez temp anc num Scola da dunnas dal Grischun.

Il campus a la Scalärastrasse sa chapescha sco cuntinuaziun architectonica dal Scaläratobel vischin cun sia cuntrada enchavada e crappusa. Betun, atschal, crap e lain caracteriseschan l’areal da scola che daventa ina cuntrada urbana tras l’architectura pregnanta.

Il concept da l’art en l’architectura ha sviluppà l’artist grischun Gian Pedretti (1926–2025). Igl è remartgabel ch’el ha envidà exclusivamain artistas. Ellas han creà lur ovras d’art specificamain per la SAP dal Grischun ed han integrà ils fatgs architectonics. Bleras ovras pon ins anc oz contemplar – per exempel la stgala da crap en il spazi exteriur, il palantschieu da lain da l’aula u la concepziun dal foyer.

Quest art na vul betg instruir, mabain animar da guardar. El envida da sa fermar e da percepir conscientamain in ambient enconuschent. (SP)

Las istoricras d’art Seraina Peer (PS) e Nicole Rampa (NR) han redigì contribuziuns da text davart las ovras per incumbensa da la SAP dal Grischun. L’artist e fotograf Donat Caduff è l’autur da las fotografias da las ovras.

Donat Caduff è creschì si a Sagogn. Sia scolaziun sco designer da grafica ha el fatg a Turitg, a Lucerna ed ad Amsterdam. Oz lavura el sco fotograf, artist ed autur e viva a Turitg. En il center da sia lavur stattan temas da la cultura da construcziun e dal spazi public cun il focus sin il Grischun.

Seraina Peer (SP) è istoricra d’art, curatura e co-fundatura da la Kunsthalle Graubünden a Cuira. Ella è creschida si bilinguamain cun rumantsch-tudestg a Cuira. Peer ha in master en istorgia d’art cun accent sin Curatorial Studies. Actualmain doctorescha ella a l’Universitad da Berna. Ella ha lavurà tranter auter en il Kunsthaus Aarau, en il Museum d’art dal Grischun, tar Art-Public Cuira ed en il Museum d’art a Soloturn. El ha co-curatà exposiziuns en il Spazi Spescha a Trun ed en il Neues Museum a Bienna e scriva per il bulletin d’art.

Nicole Rampa (NR) ha studegià istorgia d’art e germanistica a l’Universitad da Turitg. L’istoricra d’art, ch’è creschida si a Cuira, lavura oz sco curatura libra e fotografa. Sia lavur sa mova tranter l’art e l’architectura e cumpiglia la fotografia d’exposiziun e d’architectura sco era projects curatorics en il sectur da l’art modern e contemporan.