Concept da colurs da l'ischa, 1984

Suns da colur mellen
Suns da colur oransch, cotschen 
Suns da colur petrol, blau,verd
Suns da colur blau, violet

Per l’edifizi principal da la SAP dal Grischun ha Madlaina Demarmels sviluppà in concept da colurs cumplessiv che porscha orientaziun e ch’ins po a medem temp experimentar da maniera sensuala. Ils ischs e las travs dals ischs han differentas da colurs sin mintga plaun: da blauviolet en il segund plaun sutterran sur tuns da petrol, blau e verd en las etaschas suten fin tar nianzas d’alv, grisch, oransch, cotschen e mellen en las etaschas suren. La successiun da las colurs suonda al moviment vertical en l’edifizi – da tuns pli stgirs e frestgs, fin a pli clers e pli chauds.

Ils champs da colur precis sa distatgan cleramain dal betun natiral grisch dals corridors. Sche las portas èn avertas, paran ellas sco ventagls da colur serials che ritmiseschan il spazi. En lur reducziun sin colur e surfatscha fan las lavurs endament la pictura monocroma dals onns 1980. Auter ch’en il local d’exposiziun classic èn las surfatschas da colur dentant colliadas qua directamain cun il mintgadi: ils ischs vegnan averts, traversads e serrads. Els marcan passadis – e sa laschan uschia era chapir sco simbol per ils process d’emprender. Pertge che l’appropriaziun da savida na cultivescha betg in pensar en nair ed alv, mabain in pensar en nianzas e graduaziuns. (NR)