Direcziun da l‘organisaziun
Management da qualitad

Il management da qualitad serva a la Scola auta da pedagogia dal Grischun sco instrument da manar l’organisaziun a moda persistenta e contribuescha cun quai essenzialmain da realisar il mandat da prestaziun ed al svilup da la scola auta.

Directivas dal management da qualitad da la SAP dal Grischun

La finamira surordinada dal management da qualitad è la garanzia ed il svilup cuntinuà da la qualitad en tut ils secturs. La cultura da qualitad vivida è centrala.

Concret munta quai,

  • che nus sustegnain process da planisaziun e da decisiun cun metter a disposiziun infurmaziuns e datas relevantas sin tut ils nivels da decisiun.
  • ch’ils process strategics ed operativs èn reglads, documentads e suandabels.
  • che nus pussibilitain la reflexiun ed il svilup cuntinuà da l’agen agir da tut ils collavuraturs e da tut las collavuraturas.
  • che commembras e commembers da la scola pon collavurar a moda adattada, nua ch’igl è pussaivel.
  • ch’els/ellas pon contribuir a moda activa propostas da meglieraziun (p.ex. management d’innovaziun) e
  • ch’ins viva ina cultura da las “portas avertas”.

Il sistem da management da qualitad orientà al process da la SAP dal Grischun pussibilitescha da garantir e da sviluppar vinavant la qualitad da lur process, cun cumpigliar tut las commembras e tut ils commembers

La garanzia da la qualitad è part dal management da qualitad. Ella garantescha la qualitad en il senn da cuntanscher las finamiras tras mesiras d’examinaziun. I dat persunas incumbensadas per la qualitad che segireschan la garanzia da la qualitad.

Renviament al reglament davart il management da qualitad e reporting
Renviament a las directivas davart il management da qualitad e reporting (incl. management da process e garanzia da la qualitad)

Reglement Qualitätsmanagement und Reporting

Weisung Qualitätssicherung

Weisung Prozessmanagement

 

La procedura d’accreditaziun sco sigil da qualitad naziunal

Mintga scola auta sto tenor la Lescha davart l’agid a las scolas autas e lur coordinaziun (LASA) s’accreditar instituziunalmain. L’accreditaziun instituziunala è la premissa che la SAP dal Grischun dastga sa numnar scola auta da pedagogia. Tar la procedura d’accreditaziun stat il management da qualitad d’ina scola auta en il center. L’Agentura svizra d’accreditaziun examinescha per exempel co ch’ina instituziun cuntanscha e garantescha la qualitad en differents secturs. Il Cussegl svizzer d’accreditaziun decida sin fundament da l’incumbensa d’accreditaziun da l’agentura, dal rapport d’autoevaluaziun da la SAP dal Grischun, dal rapport d’ina gruppa d’experts e sin fundament da la posiziun da la SAP dal Grischun. Ils 6 da december 2019 ha il cussegl accredità la SAP dal Grischun sco scola auta.

La gruppa d’experts ha dà in bun attestat a la SAP dal Grischun en il rapport d’accreditaziun. Ella punctuescha che la SAP dal Grischun n’haja betg be nudà standards da qualitad instituziunals sin palpiri, mabain ch’ella promovia lur realisaziun cun gronda segirtad e buna performanza.

Ihr Browser (IE 11) ist leider zu alt und wird nicht mehr unterstützt.