Co pon ins crear cun granulat ina part d’ina maschina? Co pon ins gudagnar energia da la glisch dal sulegl, da vent u d’aua? Tge dovri per ch’in roboter schlia in pensum a moda independenta? Durant l’emna da MINT sa fatschentan ils uffants betg mo teoreticamain cun talas dumondas: Els dovran maschinas, lavuran cun differents materials, fan experiments e programmeschan atgnas applicaziuns.
L’emna da MINT dal Grischun collia gia dapi passa diesch onns scola ed economia. Emprendistas ed emprendists e persunas dal fatg da 15 interpresas ed organisaziuns, studentas e students da la SAP dal Grischun e persunas d’instrucziun cun experientscha accumpognan las scolaras ed ils scolars durant lur projects. A medem temp emprendan ils uffants d’enconuscher differentas professiuns e pussaivels champs da lavur en il champ da MINT.
«Durant l’emna da MINT dal Grischun sviluppeschan ils uffants atgnas vias da soluziun ed emprovan differentas ideas», di Beatrice Koller, manadra da project da las emnas da MINT dal Grischun. «Sch’ils uffants fan l’experientscha ch’els san schliar sulets u ensemen cun uffants da la medema vegliadetgna pensums cumplexs, survegnan els fidanza en sasez – er en lur mintgadi.» Pussaivel saja questa purschida entras la stretga collavuraziun da blers onns da la SAP dal Grischun cun interpresas engaschadas da l’economia grischuna.
Tut tenor la purschida tschernida passentan las participantas ed ils participants plirs dis en in’interpresa ed in u dus dis a la SAP dal Grischun. En la Val Müstair ed a Poschiavo datti purschidas regiunalas da tschintg dis.
Ils programs da quest onn permettan invistas multifaras:
Scola auta da pedagogia dal Grischun
- Ils uffants fan – accumpagnads da studentas e students – pensums davart robotica, programmar e matematica. Els construeschan e programmeschan roboters da LEGO, sviluppan apps per smartphones, exploreschan trics magics ed experimenteschan cun in roboter en furma da flura.
Partenaris da cooperaziun
- EMS-CHEMIE SA / Keller Laser SA: Ils uffants fan tranter auter experiments chemics, emprendan d’enconuscher materias sinteticas e lavuran cun quellas, fresan in element ed elavuran u lutegian metal. Durant questas lavurs survegnan els invista en differentas professiuns tecnicas sco per exempel en la polimecanica, en la lavur da labor, en la tecnologia da materias sinteticas, en la logistica sco er en la construcziun d’indrizs ed apparats.
- Georg Fischer Rohrleitungssysteme SA, Seewis-Pardisla: Las scolaras ed ils scolars fan l’experientscha co ch’ins po crear products or da granulat da plastic. Els produceschan sezs tocca da plastic e fan in’atgna lampa da LED cun fresar, lutegiar e programmar.
- Banca Chantunala Grischuna, Cuira / Inventx SA, Cuira: Ils uffants survegnan invista da las relaziuns da banking, informatica ed innovaziun digitala. Els emprendan d’enconuscher differents champs professiunals, schlian pensums da programmar e da logica e s’occupan da process digitals e da dumondas da segirezza.
- Hamilton SA, Bonaduz: Ils uffants lutegian ina plattina electronica, programmeschan in Arduino, elavuran ina platta da plexiglas e construeschan in agen product.
- Repower SA, Küblis: Las participantas ed ils participants experimenteschan cun circuls electrics, bajegian in mini «filfier chaud», fan in percurs cun in mini-plunader, emprovan dad ir cun la crana en la halla da maschinas e raivan - segirads - sin ina pitga d’electricitad d’exercizi.
- Repower Camp MINT, Val Poschiavo: Durant l’emna da champ construeschan ils uffants tranter auter in panel solar, ina roda da vent ed ina mini-turbina. Plinavant lutegian els in set da construcziun per principiantas e principiants e programmeschan in roboter da LEGO Spike. Gieus e divertiment na vegnan betg a la curta durant l’emna da champ.
- Viafier retica SA, Landquart / login furmaziun professiunala SA, Landquart: Ils uffants creeschan en il center da furmaziun da la login furmaziun professiunala SA elements da construcziun e regulaziun. Plinavant survegnan els invista en il lavuratori principal da la VR.
- Thomann Nutzfahrzeuge SA, Cuira: Ils uffants survegnan invista en la lavur cun vehichels utilitars. Els midan ina roda dal camiun, vegnan conscients ch’i dat in angul mort – in spazi che n’è betg visibel per la manischunza u il manischunz, bajegian e testeschan in agen gokart e fan in viadi d’emprova cun in camiun.
- TRUMPF Svizra SA, Grüsch: Las participantas ed ils participants storschan tocs d’aluminium, lutegian plattas e mettan cabels, monteschan parts mecanicas e construeschan elements da construcziun. Durant far quellas lavuras survegnan els invista en il mintgadi dals secturs da l’automatisaziun, da la mecanica e da la construcziun.
Ulteriuras purschidas en la Val Müstair pussibiliteschan la scrinaria da mobiglias da schember PichaLain SA, la firma da tecnica sanitara Tschenett AG, l’interpresa da medias Aimara AG ed il parc natiral regiunal Biosfera Val Müstair.
