Dals 15 als 28 da november 2024 è l’exposiziun ambulanta «Hermelin: woher–wohin?» da Pro Natura da chattar sin il campus da la Scola auta da pedagogia dal Grischun. L’exposiziun illustrescha en moda impressiunanta la midada da la cuntrada cultivada en il Grischun ed en Glaruna e mussa tge consequenzas che questas midadas han per l’ermelin ed autras spezias d’animals.
Per sia vita quotidiana è l'ermelin dependent d'ina cuntrada multifara cun laina, crappa e vegetaziun sco territori da chatscha e da pussaivladads da sa zuppar. Ma cun las midadas da nossa cuntrada cultivada è quest spazi da viver periclità.
Cumparegliaziuns fotograficas istoricas ed actualas documenteschan, quant multifar e ritg ch'il terren cultivà en il Grischun ed en Glaruna è stà fin il 19avel tschientaner: Vitgs eran circumdads da pitschens champs, da pumera, da chaglias e da mirs da crap che servivan sco spazis da viver impurtants per numerusas spezias d'animals. A partir da la mesadad dal 19avel tschientaner è quest maletg sa midà: il progress tecnic ha pussibilità in'agricultura pli intensiva che ha midà fitg bleras structuras da la cuntrada. Plantas da pumera e chaglias èn vegnidas runcadas en blers lieus, mirs da crappa èn vegnids allontanads e terrassas gulivadas, uschia che la diversitad da las structuras da la cuntrada è sa reducida fermamain.
L'exposiziun mussa ils midaments da la cuntrada en las regiuns
• Grischun central / Tumleastga / Valragn / Mesolcina
• Engiadina / vals dal sid
• Val dal Rain / Scanvetg
• Surselva
• Glaruna
L'exposiziun «Hermelin: Woher – Wohin?»» è da chattar dals 11 fin 28 da november 2024 a la Scola auta da pedagogia dal Grischun
La SAP dal Grischun mussa l'exposiziun en il rom da sia strategia da persistenza e da ses engaschament per dapli biodiversitad sin ses campus. Cun quai vul la scola auta contribuir – ensemen cun la Pro Natura – per promover la diversitad da las spezias.
L'exposiziun è publica ed accessibla libramain durant las uras d'avertura da la SAP dal Grischun.
La Pro Natura dal Grischun s’engascha ensemen cun la secziun Glaruna e cun ulteriurs partenaris per dapli biodiversitad e ritgezza structurala en il terren cultivà. Cun il project «Aktion Hase & Co» promova Pro Natura dapli "natira" sin prads, pastgiras ed ers en tut la Svizra. L’acziun regiunala en il Grischun ed en Glaruna s’engascha cun projects da revalitaziun tant per novas structuras sco era per mantegnair structuras existentas sco chaglias, mirs sitgs, mantuns da roma e da crappa u era per urs en il terren cultivà. Il segn distinctiv dal project glarunais e grischun è l’ermelin, perquai ch’el è dependent da questas structuras en sia vita quotidiana. Nua che l’ermelin sa senta bain, vivan er raunas, utschels, avieuls selvadis e bleras autras sorts d’animals.
Fin la proxima primavaira vegn ina part da l’iert da la SAP dal Grischun transfurmada en in paradis per ils avieuls selvadis ed autras spezias d’animals indigenas. Il project fa part da la strategia da persistenza da la scola auta e duai prestar ina contribuziun preziusa per la biodiversitad sin il campus.
ulteriuras infurmaziuns
La professiun sco persuna d’instrucziun pretenda in engaschament social cun effect persistent e cun gronda responsabladad. Persunas d’instrucziun furman generaziuns futuras e las sensibiliseschan per las sfidas socialas, ecologicas ed economicas da l’avegnir. Ellas portan e transportan responsabladad per il mund en il qual nus vivain. La SAP dal Grischun las sustegna en quest agir.
ulteriuras infurmaziuns
Ils Sustainable Development Goals (SDGs) èn 17 finamiras per in svilup persistent e defineschan terms economics, ecologics e socials che duain vegnir cuntanschids fin l'onn 2030. Els furman il coc da l'agenda 2030, deliberada da tut ils commembers da las Naziuns unidas l'atun 2015. La SAP dal Grischun ha fixà quatter finamiras.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.