Chalender d'occurrenzas
Emna da MINT dal Grischun 2026

Durant las vacanzas d'atun han scolaras e scolars da la 3. fin 6. classa primara la pussaivladad da schlargiar lur cumpetenzas da MINT e da rimnar preziusas experientschas praticas.

Data

12-10-2026 - 16-10-2026

Temp

09:00 - 16:00

Lieu

Bündner Firmen in Chur, Landquart, Ems, Bonaduz und Grüsch

Organisatur

Scola auta da pedagogia dal Grischun

Durant l’emna da MINT dal Grischun (MINT-CAMPs GR) collavuran emprendistas ed emprendists d’interpresas grischunas stretgamain cun studentas e students da la SAP dal Grischun e cun persunas d’instrucziun cun experientscha. Els entusiasmeschan uffants e giuvenils per activitads praticas sco marclar, programmar u construir ed instrueschan els communablamain en il manaschi al lieu. Las persunas d’instrucziun schlargian en questa cooperaziun e cun agid dad experientschas da hands-on lur enconuschientschas dal rom, da la didactica dal rom sco era lur savida pedagogica.

Tgi po sa participar?

Es ti scolara u scolar da la 3. fin 6. classa? Lura ans legrain nus sin tai.

Nua ha lieu l’emna da MINT dal Grischun?

Ils uffants visitan durant trais dis firmas grischunas a Cuira, a Landquart, a Domat, a Panaduz ed a Grüsch. Tar l’annunzia po vegnir tschernì in lieu tenor giavisch. Dus dis passentan ils uffants a la SAP dal Grischun a Cuira.

Per il lieu en il Puschlav purschain nus in program spezial. Dapli infurmaziuns chattais Vus qua sut.

Tge custa la purschida?

La participaziun a l’emna da MINT dal Grischun è da princip gratuita.

Per sa participar al champ da la Repower vegn incassada ina pauschala da spesas.

Co vegnan las scolaras ed ils scolars tar las firmas?

Ils geniturs vegnan supplitgads da manar lur uffants mintgamai la damaun als lieus da scuntrada fixads e da vegnir per els il suentermezdi. Ils transfers durant la purschida vegnan organisads dals partenaris dal project.

Resguardai per plaschair las indicaziuns spezialas davart il transfer per il champ da la Repower en la Val Poschiavo.

S'annunziar uss!

Tschertas purschidas da firmas èn gia cumplettas. Las plazzas libras pon ins vesair qua:

Nus offrin plazs a Poschiavo

Er il champ da sis dis en il Puschlav empermetta puspè bler divertiment e tensiun. Sco gia l’onn passà lavuran ils uffants tar la firma Repower vi d’ina ovra idraulica miniatura, in parc da vent e pitschens panels solars. L'alloschi durant il champ è organisà al lieu.

Durada: 12 fin 16 d’october 2026

Tut las infurmaziuns davart las taxas da participaziun e davart la responsabladad èn da chattar en il link d’annunzia.
Detagls organisatorics suondan avant il cumenzament dal champ.

Highlights dals ultims onns

Partenaris da cooperaziun

Da la lampa da LED fin a l’ovra electrica: Emna da MINT dal Grischun: Experimentar, programmar e construir durant las vacanzas d’atun

Programmar in roboter, construir in panel solar, ina roda da vent ed ina mini-turbina u lutegiar in toc per ina maschina: Durant l’emna da MINT dal Grischun dals 12 fin ils 16 d’october 2026 scuvran scolaras e scolars da la 3. fin 6. classa il mund da la matematica, da l’informatica, da las scienzas natiralas e da la tecnica. La participaziun è gratuita.

ulteriuras infurmaziuns

Perscrutaziun & svilup: Projects da MINT

Cun la promoziun da MINT prenda la Scola auta da pedagogia dal Grischun en mira che persunas d’instrucziun futuras sco era talas cun experientscha enconuschan las novas tecnologias, las san applitgar ed utilisar en l’instrucziun. Las scolastas ed ils scolasts vegnan entusiasmads per cuntegns da MINT ed acquistan abilitads da promover questas cumpetenzas da lur scolaras e scolars.