Promoziun MINT

Cun la promoziun da MINT prenda la Scola auta da pedagogia dal Grischun en mira che persunas d’instrucziun futuras sco era talas cun experientscha enconuschan las novas tecnologias, las san applitgar ed utilisar en l’instrucziun. Las scolastas ed ils scolasts vegnan entusiasmads per cuntegns da MINT ed acquistan abilitads da promover questas cumpetenzas da lur scolaras e scolars.

En quest connex mettain nus en il center l’incumbensa orientada a problems or da l’ambient da viver dals uffants e mettain il focus sin la colliaziun da la tecnica (enconuschientschas dal rom) cun las cumpetenzas dal futur: cooperaziun, communicaziun, creativitad e pensar critic.

EMNA DA MINT DAL GRISCHUN

CAMPS DA MINT

Durant l'emna da MINT dal Grischun instrueschan studentas e students da la SAP dal Grischun ed emprendistas ed emprendists da manaschis grischuns las mattatschas ed ils mattatschs en il lieu correspundent da l'interpresa sco er a la SAP dal Grischun ed als rendan pli famigliar cun il mund da la tecnica.

Center da MINT da la SAP dal Grischun

Lavuratori d’innovaziun e lieu da scuntrada enina!

Cun il center da MINT è sa sviluppà ils ultims onns in lavuratori d’innovaziun a la SAP dal Grischun. Là san persunas d’instrucziun, studentas e students, sco era scolaras e scolars experimentar tant cun utensils digitals sco era cun utensils tradiziunals. Els rinforzan lur savida sin il nivel pratic en il center da MINT e sa barattan cun persunas spezialisadas da las cooperaziuns cun la SPF da Turitg, cun l’economia grischuna e cun autras instituziuns. En il center da MINT vegn bajegià, programmà, stampà, marclà, lutegià etc., tut da maniera communabla.

Questa purschida d’emprender dat novs impuls, porscha spazi per creativitad e prepara ideas concretas per realisar l’instrucziun.

MINT en il context da scola

MINTmobil

Trics per l’instrucziun da MINT che collia ils roms

Cun il MINTmobil visitain nus al lieu persunas d’instrucziun e lur classas. Nus pigliain per mauns ils cuntegns ed entusiasmain las persunas d’instrucziun per in’instrucziun da MINT che collia ils roms. Entant che la persuna d’instrucziun vegn instruida d’ina docenta u d’in docent, lavura in auter docent u in’autra docenta cun la classa vi da projects concrets. Suenter la scolaziun agescha la persuna d’instrucziun sco multiplicatura en sia scola. Ella po sa spezialisar en il CAS Support pedagogic dad ICT u en il CAS Informatica. Il CAS Informatica vegn purschì en collavuraziun cun la SPF da Turitg.

Las differentas perspectivas ed ils rapports d’experientscha:
MINTmobil
Giulia (scolara)
Andy (manader da scola)
Pascal (docente team-MINT)
Sereina (persuna dìnstrucziun)

MINTfocus

Utilisar cuntegns da MINT da maniera simpla ed effectiva en l’instrucziun? Ideas concretas per persunas d’instrucziun interessadas:

Cun MINTfocus lantscha la SAP dal Grischun da nov ina retscha d’occurrenzas nua che la promoziun da MINT en la scolina ed en las scolas primaras stattan en il focus. Durant sairas divertentas vegnan tractads temas da MINT actuals, vegnan dads inputs u preschentads exempels d’instrucziun adattads per la pratica. Cun adattar exactamain las purschidas succeda quai adina uschia che las participantas ed ils participants pon scuvrir activamain.

Lavuratori da MINT

Co pon persunas d’instrucziun ademplir la pretensiun d’ina realisaziun interdisciplinara en l’instrucziun?

Da nov dispona il center da MINT d’in lavuratori da MINT nua ch’il process “da l’idea al product” stat en il center. Quai permetta a las persunas d’instrucziun d’absolver il process total d’in svilup da products cun lur classa. En quest connex vegnan ellas sustegnidas resp. guidadas dal team da MINT da la SAPGR. En il lavuratori da MINT èn da chattar utensils per sustegnair process da pensar communabels, per crear, per construir e per producir prototips innovativs. Il lavuratori da MINT sa concentrescha oravant tut sin printing da 3D en interacziun cun ils enconuschents «educational Robot-Sets» e sin platinas per savair producir ils prototips da moda e maniera simpla. Noss lavuratori da MINT sa basa per part sin las ideas d’in MakerSpace u d’in lavuratori d’emprender.

La pretensiun dad intermediar cuntegns dal plan d’instrucziun dal modul Medias ed informatica da maniera integrada en ils roms po esser ina sfida per ina persuna d’instrucziun. En ina confruntaziun che scuvra da maniera activa scenaris d’instrucziun cumprovads, vegnan las persunas d’instrucziun famigliarisadas resp. promovidas cun ils cuntegns da MINT, ed i vegn mussà co ch’ellas adempleschan la pretensiun d’ina realisaziun interdisciplinara. Era persunas d’instrucziun cun pauca affinitad per tecnica èn cordialmain bainvegnidas.

Center Roberta

Per giuvnas? Cler!

Ambients d’emprender inclusivs

Cun l’avertura d’in center Roberta-Regio (en cooperaziun cun la Fraunhofer-Gesellschaft zur Förderung der angewandten Forschung e. V.) ha la SAPGR amplifitgà vinavant la purschida en il champ robotica cun in focus spezial sin ambients d’emprender inclusivs.

MINT en il champ extrascolar

Emna da MINT dal Grischun (MINT-CAMPs GR)

Tge collia l’economia e la scola? E co poss jau profitar da questa cooperaziun sco persuna d’instrucziun futura u versada?

u

Uschia funcziuna ina firma...

Durant l’emna da MINT dal Grischun (MINT-CAMPs GR) collavuran emprendistas ed emprendists dad interpresas grischunas stretgamain cun studentas e students da la SAP dal Grischun e cun persunas d’instrucziun versadas. Els entusiasmeschan uffants e giuvenils per lavurs praticas sco marclar, programmar u construir ed instrueschan els communablamain en il manaschi al lieu. Las persunas d’instrucziun schlargian en questa cooperaziun e cun agid dad experientschas da hands-on lur savida dal rom, da la didactica dal rom sco era lur savida pedagogica.

Partenaris da cooperaziun: RhB, Keller Laser AG, TRUMPF Schweiz AG, EMS-CHEMIE AG Domat/Ems, Georg Fischer Rohrleitungssysteme AG.

i-CAMPs GR Kids

Vuls ti savair co ch’il mund digital funcziuna, co ch’ins programmescha, bajegia maschinas e co ch’ins dat alura vita a questas?

Programmar, giugar, cuminanza: Ils i-CAMPs GR Kids intermedieschan cumpetenzas che uffants e giuvenils (3. fin 9. classa) dovran per il futur. Las participantas ed ils participants han la chaschun da fufragnar en il mund da programmar, da rimnar experientschas impurtantas e da scuvrir novas chaussas. Programmar e tschertgar atgnas schliaziuns, quai fa plaschair.

i-CAMPs GR Teacher

Colliar cumpetenzas da l’informatica e d’ulteriurs roms d’instrucziun da maniera effectiva?

Ils i-CAMPS Teacher èn ina purschida da perfecziunament per persunas d’instrucziun dal 1., 2. e 3. ciclus en il champ informatica e didactica da l’informatica. En ils i-CAMPs GR Teacher, che han lieu ils 2 e 3 d'avust, ed ils i-CAMPs GR Kids, che han lieu parallelamain, stat la robotica en il center. Il perfecziunament cumpiglia l’occupaziun cun il Lego Spike Essential resp. il Lego Spike Prime System. Tut tenor stgalim d’instrucziun vegnan quests sistems programmads sa basond sin blocs (blocs da Lego / Scratch) u perfin cun Python. I vegn mussà materialias d’emprender concretas che pussibiliteschan il svilup da las cumpetenzas d’informatica e medemamain d’ulteriurs roms d’instrucziun.

Persunas d’instrucziun che vulan suenter approfundar lur enconuschientschas, han la pussaivladad da collavurar il venderdi cun las expertas ed ils experts da la SAP dal Grischun als i-CAMPs GR Kids (purschida facultativa).

First Lego League (FLL)

Sa mesirar cun ils i-Girls e cun ils Fluffys?

Dapi 2008 sustegna la SAP dal Grischun ensemen cun la EMS Schiers e cun la FH Grischun il program da promoziun MINT „First Lego League“ che vegn realisà internaziunalmain. La FLL è in program da promoziun che famigliarisescha uffants e giuvenils en in’atmosfera sportiva cun scienza e tecnologia, ch’als facilitescha l’access a roms da las scienzas natiralas e che sveglia a temp l’interess per professiuns d’inschigner u d’IT. Uffants e giuvenils vegnan uschia entusiasmads per scienza e tecnologia, vivan l’idea dal spiert da gruppa e vegnan animads da chattar schliaziuns creativas grazia ad incumbensas cumplexas.

En quest program vegn resguardà l’ambient da viver dals uffants ed ins promova da vegnir a frida cun sbagls e da pensar da maniera analitica, examinanta.

Las scolaras ed ils scolars da nov fin sedesch onns bajegian mintgamai in roboter cumplettamain automatic per l’uschenumnà “Robotgame”, per schliar pliras incumbensas entaifer 150 secundas sin in champ da gieu fixà. Mintgamai al di da la concurrenza preschentan els ad ina giuria questas lavurs ed ideas e lur abilitads da lavurar sco team en las categorias “valurs da basa, preschentaziun da la perscrutaziun e robotdesgin”.

Dapi l’avust 2020 accumpognan studentas e students da la SPF da Turitg ensemen cun studentas e students da la SAP dal Grischun ils uffants e giuvenils en ils dus teams da success da la SAP dal Grischun, ils “i-Girls” ed ils “Fluffys”.