La Scola auta da pedagogia dal Grischun è danovamain accreditada instituziunalmain. Il Cussegl svizzer d’accreditaziun conferma uschia il sistem da management da qualitad da la SAP dal Grischun. Il team d’expertas ed experts externs appreziescha en spezial il svilup dinamic da la scola auta, sco era sias fermezzas en il studi, en la furmaziun supplementara ed en la perscrutaziun.
Cun la decisiun dals 18 da settember 2026 ha il Cussegl svizzer d’accreditaziun confermà l’accreditaziun instituziunala da la Scola auta da pedagogia dal Grischun da l’onn 2019.
La basa per la decisiun dal cussegl d’accreditaziun è la valitaziun da tschintg expertas ed experts externs. Quels han examinà 18 criteris da qualitad en ils champs strategia per garantir la qualitad, governance, instrucziun/perscrutaziun/servetschs, resursas sco era communicaziun interna ed externa.
En la decisiun dal cussegl d’accreditaziun hai num:
«La gruppa d’expertas e d’experts appreziescha la SAP dal Grischun sco scola auta bain manada cun ina ferma cultura da qualitad ed in sistem da management da qualitad efficazi. Accentuads vegnan la gronda conscienza per qualitad da tut las commembras e da tut ils commembers da la scola auta, la cultura da feedback e da participaziun vivida, la communicaziun interna transparenta sco era la stretga colliaziun tranter la strategia, il management da qualitad e la direcziun da la scola auta. Plinavant vegnan valitadas a moda positiva las cleras structuras da direcziun, l’orientaziun consequenta a la pratica, a la perscrutaziun sco basa ed a l’innovaziun en l’instrucziun ed en la furmaziun supplementara sco era la vasta purschida da prestaziuns en relaziun cun la grondezza da la scola auta.»
Las expertas ed ils experts apprezieschan plinavant il svilup dinamic e reussì da la SAP dal Grischun durant ils ultims onns. Spezialmain accentuadas vegnan la «capacitad d’innovaziun tras il studi da master Stgalim secundar I per persunas cun in bachelor u master spezialisà», la «purschida considerabla da cussegliaziun e furmaziun supplementara» sco er il «portfolio da perscrutaziun e da svilup cleramain definì ed unic en ses gener».
La SAP dal Grischun nizzegia ils resultats da la procedura per sviluppar vinavant il management da qualitad. Las recumandaziuns dal team extern correspundan per gronda part a mesiras che la SAP dal Grischun ha gia realisà u instradà. Cun l’accreditaziun è colliada ina cundiziun: per verifitgar che las finamiras vegnian cuntanschidas, duai la scola auta en il futur far diever da dapli indicaturs quantitativs. La scola auta ha gia cumenzà cun las lavurs correspundentas. La cundiziun sto vegnir realisada entaifer 18 mais.
La decisiun dal cussegl d’accreditaziun è vegnida precedida ina procedura da var dus onns ch’è vegnida accumpagnada da l’Agentura svizra per accreditaziun e garanzia da qualitad (AAQ). Var in terz da las collavuraturas e dals collavuraturs sco era var diesch studentas e students da differents onns da studi han collavurà al rapport da l’autoevaluaziun da la SAP dal Grischun ed èn stads a disposiziun durant trais dis per las dumondas dal team d'expertas ed experts externs.
La Lescha davart l’agid a las scolas autas e lur coordinaziun (LASA) e l’ordinaziun d’accreditaziun LASA obligheschan tut las scolas autas svizras da laschar examinar regularmain lur sistem da management da qualitad en il rom d’ina accreditaziun instituziunala per garantir ch’ils standards da qualitad vegnian observads. L’accreditaziun è la premissa per obtegnair il titel sco Scola auta da pedagogia e vala mintgamai per otg onns.
Il rapport da l’autoevaluaziun cun la posiziun da las expertas e dals experts vegn integrà en furma da link sin la pagina-web da la SAP dal Grischun suenter che l’Agentura svizra per accreditaziun e garanzia da qualitad (AAQ) ha publitgà quel.
Il management da qualitad da la SAP dal Grischun è in instrument da manar l’organisaziun a moda persistenta e contribuescha cun quai essenzialmain d'ademplir il mandat da prestaziun ed il svilup da la scola auta.
ulteriuras infurmaziuns
Cun la strategia 2025–2028 prepara la Scola auta da pedagogia dal Grischun il terren per il futur. Sa basond sin la visiun 2036, metta ella ils suandants accents: la furmaziun da persunas d’instrucziun ch’ageschan da maniera professiunala, la promoziun da la plurilinguitad, il diever da las tecnologias digitalas, il svilup persistent ed il rinforzament da la scola auta sco instituziun da furmaziun attractiva. Uschia contribuescha la scola auta activamain a la qualitad ed al svilup da la furmaziun da las scolastas e dals scolasts.
ulteriuras infurmaziuns
Wissenschaftlicher Mitarbeiter II, als Redaktor
Ihr Browser (IE 11) ist leider zu alt und wird nicht mehr unterstützt.