Events

Inscunters cun «sauns impuls» 

La fin da matg èn puspè var 80 persunas stadas a la SAP dal Grischun. Ina da las purschidas è stada en connex cun ils «impuls sauns» cun il project «Scola en moviment».

Inscunters – qua sa collian persunas d’instrucziun en curs e survegnan impuls captivants. En las purschidas stattan mintgamai en il center ideas praticas, metodas creativas ed il svilup cuminaivel da la scola e da l’instrucziun.

Moviment per ina sauna cultura da scola
En il rom dals «impuls sauns» organisads dal post spezialisà per la promoziun da la sanadad, ha la preschientscha da dr. Tim Hartmann, docent a la facultad medicinala da l’universitad da Basilea, mess in accent spezial. Cun agid d’exempels da la «Scola en moviment» ha el mussà co che midadas dal cumportament pon vegnir iniziadas da maniera efficazia e francadas a lunga vista. Cun il project «Scola en moviment» survegnan ils uffants avunda spazi per viver lur basegn da sa mover natiral, da rimnar experientschas da moviment positivas e da sa nutrir a moda equilibrada. Tar il «gummitwist» èn vegnidas svegliadas tant regurdientschas vi da l’agen temp da scola ed igl ha dà l’occasiun per barats e discurs. Las participantas ed ils participants han sviluppà impuls concrets per sasez, per lur instrucziun e per lur ambient da scola.

Era questa giada ha ina classa da scola mussà grond engaschament ed ha contribuì cun sia stiva da café simpatica a l’atmosfera empernaivla da l’occurrenza. Karma's Kitchen ha servì momos e spisas picantas che las participantas ed ils participants han apprezià.