Tgi che vul far musica, va en la scola da musica? Uschè simpel n’èsi betg. Malgrà las contribuziuns da sustegn da la Confederaziun, dal chantun e da las vischnancas ston geniturs pajar sezs ina part dals custs per la scola da musica. Perquai n’è la scola da musica betg accessibla egualmain a tut ils uffants. La scola è uschia bler dapli ch’in lieu supplementar da la furmaziun musicala. «L’instrucziun da musica è per blers uffants l'unic lieu, nua ch'ins po emprender musica da maniera organisada», di Esther Bläsi-Huber, docenta da ritmica e manadra dal CAS a la Scola auta da pedagogia dal Grischun.
L’instrucziun musicala avra als uffants ed als giuvenils in access a la cultura ed a l’expressiun artistica. Quai è bler dapli che chantar ensemen. In’instrucziun moderna collia tadlar, sa mover, sautar e far musica cun inventar e crear. Las scolaras ed ils scolars na duain betg mo imitar musica existenta, mabain sviluppar atgnas ideas e laschar nascher insatge communablamain.
Per che tals process gartegian, dovri persunas d’instrucziun che san animar ed integrar differentas premissas musicalas. La virtuositad n’è betg decisiva. Pli impurtantas sajan la passiun per la musica ed ina basa solida da cumpetenzas fundamentalas da musica, declera Bläsi-Huber. Manar ina classa en in process da lavur musical pretenda preschientscha, segirezza metodica ed in dun per crear.
Qua cumenza il CAS Musica da la Scola auta da pedagogia dal Grischun. La scolaziun da dus onns sa drizza a persunas d’instrucziun da la scola populara cun interess per musica. Las participantas ed ils participants approfundeschan lur cumpetenzas musicalas e didacticas dal rom e sviluppan lur instrucziun directamain en la pratica. Els fan musica, improviseschan e concepeschan, lavuran en gruppas d’emprender e barats da CoLearning, visitan in l’auter en l’instrucziun e vegnan accumpagnads persunalmain. Sco finiziun concepeschan e realiseschan els in’atgna producziun musicala.
Il proxim CAS Musica da la SAP dal Grischun cumenza la stad 2027. Sur il suandant link pon persunas interessadas s'inscriver: https://phgr.ch/weiterbildung/cas-unterteilung/cas-musik/
