Communicaziun a las medias

19 pertschient dapli annunzias per la SAP dal Grischun

Auta qualitad da la scolaziun

«Il grond dumber d’annunzias è bun per la scola populara dal Grischun, bun per la regiun sco center da scolaziun auta e bun per la SAP dal Grischun», di Reto Givel, rectur da la SAP dal Grischun. Era sche la situaziun en las scolas na saja ozendi betg pli uschè acuta: Il basegn da persunas d’instrucziun cun ina buna qualificaziun è vinavant grond. La quota creschenta da studentas e students extrachantunals interpretescha el sco segn che l'auta qualitad da la furmaziun, ch’è orientada a la pratica, vegnia era percepida sur ils cunfins chantunals ora. «Quai rinforza la regiun sco lieu da furmaziun ed è in indizi per l’attractivitad da la SAP dal Grischun», sa lascha el citar.

Augment repartì sin studis

L’augment da 19 pertschient sa reparta sin differents studis: Las pli bleras annunzias novas registrescha il studi Scola primara cun 163 annunzias (onn passà 132); da quellas èn 23 persunas (l’onn passà 16) en il model a temp parzial. Per il studi Scolina e scola primara (1. fin 2. classa) hai dà 43 annunzias (onn passà 36). L’access a la professiun da scolast:a succeda oz sur bler dapli vias da furmaziun che pli baud. 34 pertschient da las persunas annunziadas han ina maturitad gimnasiala. Ils ulteriurs cuntanschan l’admissiun sur la maturitad professiunala en pedagogia, la maturitad professiunala cun examen d’admissiun u sur autras vias da furmaziun. La via per daventar scolast:a è uschia daventada cleramain pli multifara.

Las annunzias per ils studis da master Stgalim secundar I per persunas cun in bachelor spezialisà e Stgalim secundar I/scolas da maturitad per persunas cun in master spezialisà restan constantamain autas cun 28 persunas (onn precedent 28).

Ils dus studis da master da cooperaziun n’èn anc betg inclus en las 234 annunzias: Per il studi da master Pedagogia curativa da scola èn s’annunziadas 18 persunas (onn avant 34); questas studentas e students èn immatriculads a la Scola auta per pedagogia curativa a Turitg. In pau sut las aspectativas resta fin uss cun 10 annunzias il studi da master Stgalim secundar I per persunas d’instrucziun – quest termin d’annunzia finescha dentant pir ils 30 da zercladur; las studentas ed ils students èn immatriculads a la SAP da Son Gagl.

Clusters d’emprender e biros supplementars

Il grond dumber constant da studentas e students munta era sfidas per l’infrastructura: Il campus da la Scola auta da pedagogia è pli che surchargià. Gia avant trais onns ha la scola auta endrizzà sin il plaz da la posta a Cuira spazis d’emprender averts sur duas etaschas. En il decurs da l’onn da studi actual ha ella ultra da quai transfurmà sia aula en in spazi d’emprender avert. A partir dal proxim semester affitta la SAP dal Grischun ulteriuras localitads sin il plaz da la posta. Là datti novs plazs da lavur per il prorectorat perscrutaziun e svilup che s’augmenta grazia als meds da terzs.

Remartga: Il dumber effectiv da las studentas e dals students po anc sa midar fin al cumenzament da l’onn da studi. En spezial stat quai en connex cun il fatg che las cundiziuns d’admissiun n'eran anc betg ademplidas il mument dal termin d’annunzia e/u cun las annunzias multiplas en differentas scolas autas.