Scolas n'èn betg be lieus per acquistar enconuschientschas e cumpetenzas. Ellas giogan era ina rolla impurtanta, sch'i va per la promoziun da la sanadad ed il bainstar da persunas d'instrucziun sco era da scolaras e scolars. Per la scola han las manadras ed ils manaders da scola in'impurtanza speziala. Cun lur cumportament persunal da manar e cun priorisar il tema en lur instituziun influenzeschan els decisivamain la sanadad ed il bainstar en lur scola.
Ma co funcziuna ina promoziun da la sanadad effectiva?
Part 1: Rinforzar las atgnas resursas
Tge pon las direcziuns da la scola e persunas d'instrucziun far activamain per lur atgna sanadad fisica e psichica? L'emprim di dal forum s'avischina a questa dumonda sin differents nivels. Il referat d'avertura tegna l'enconuschenta neuroscienzada dr. Barbara Studer. Cun invistas fundadas da la neuroscienza e psicologia mussa ella a moda divertenta co che nus pudain trair a niz e realisar sezzas e sezs e da maniera effectiva las enconuschientschas da la perscrutaziun las pli novas en noss mintgadi. Las visitadras ed ils visitaders spetga in suentermezdi plain inspiraziun e strategias praticas.
Part 2: Direcziun da la scola sco clav per ina scola sauna
En il center dal segund di stat la direcziun da la scola sco persuna-clav per ina scola sauna. In ulteriur punct culminant è il referat da prof. dr. Silvio Herzog, anteriur rectur da la SAP da Sviz. Sut il titel “Salutogenes Führungsverhalten: Das 3x3 des zeitgemässen Handelns” vegn el a dilucidar l’impurtanza da la promoziun da la sanadad per persunas d'instrucziun e mussar pertge che direcziuns da scola han ina rolla centrala en quest process. Silvio Herzog è referent, docent ed autur da cudeschs davart il tema direcziun da scola.
Ultra da keynotes da Barbara Studer e Silvio Herzog approfundeschan referentas e referents en sis lavuratoris la tematica dal rinforzament da las resursas en las scolas.
Al Forum da direcziuns da la scola da la Svizra Orientala vegn purschì a las manadras ed als manaders da scola durant dus dis la pussaivladad da sa barattar davart best practice ed ideas innovativas e da sa colliar vicendaivlamain.
Davart il Forum da las direcziuns da la scola da la Svizra Orientala
ll Forum da las direcziuns da la scola da la Svizra Orientala è ina iniziativa communabla da las scolas autas da pedagogia dal Grischun, da Son Gagl e da la Turgovia. La finamira dal forum è da porscher a las direcziuns da la scola ina plattafurma per barattar ideas, experientschas e praticas cumprovadas e da las sustegnair tar lur incumbensas da direcziun.
