La SAP dal Grischun
Nossa SAP dal Grischun

La Scola auta da pedagogia dal Grischun scolescha persunas d’instrucziun per la scola populara. Ella promova plinavant il perfecziunament professiunal da las persunas d’instrucziun cun resguardar la perscrutaziun ed il svilup dal rom e da la didactica dal rom. La SAP dal Grischun metta ils accents da perscrutaziun sin “plurilinguitad”, “scola alpina” sco era sin “scola e tecnica”. Quests accents èn caracteristics per la singularitad da la scola auta.

Realisar la SAP dal Grischun per il futur  

La SAP dal Grischun porscha a las studentas ed als students ed a las persunas d’instrucziun cundiziuns da basa optimalas per ina scolaziun e furmaziun cuntinuada che ha success e ch’è orientada a la professiun. Ella porscha a tut las collavuraturas ed a tut ils collavuraturs cundiziuns da lavur progressivas, promova l’emprender cuntinuant, ha quità da sia cuminanza e rinforza quella. En l’atmosfera famigliara da la SAP dal Grischun èn las vias da decisiun curtas e la libertad d’agir per schliaziuns innovativas e sveltas è gronda. Uschia presta la SAP dal Grischun ina contribuziun activa per la convivenza sociala e culturala en il chantun Grischun. La SAP dal Grischun furma ed elavura ses futur da maniera communabla, persistenta e cun auta qualitad. Ella sa sviluppa sin tut ils nivels sco scola auta da pedagogia cun resguardar sia structura e cultura unica. 

Nizzegiar la varietad linguistica sco schanza  

La SAP dal Grischun è la suletta scola auta da pedagogia trilingua en Svizra. La SAP dal Grischun rinforza las trais linguas chantunalas e pussibilitescha access ad ulteriuras linguas. La SAP dal Grischun ha etablì la professura speziala per didactica da plurilinguitad integrada, sviluppa meds d’instrucziun e fa perscrutaziun dal rom e da la didactica dal rom. Uschia promova ella la plurilinguitad. Las collavuraturas ed ils collavuraturs da la SAP dal Grischun garanteschan sco spezialistas e spezialists ina scolaziun e furmaziun cuntinuada interdisciplinara ed attractiva. 

 

Rinforzar la scola e l’instrucziun en il territori alpin  

Scolas e lur acturs en territoris alpins e perifers han basegns spezials che chaschunan dumondas spezialas. En la furmaziun da las persunas d’instrucziun vegnan resguardads lieus d’emprender ordaifer la scola, i vegn sensibilisà per in svilup persistent e la relaziun cun l’eterogenitad vegn rinforzada. La SAP dal Grischun utilisescha da maniera effectiva ils resultats da la perscrutaziun e dal svilup dal rom e da la didactica dal rom sco era las experientschas da la pratica.  

Sviluppar la furmaziun en la midada digitala  

La strategia da la SAP dal Grischun s’orientescha al fatg che las cumpetenzas en ils champs tecnics e da las scienzas natiralas èn centralas per il futur da nossa societad. Promover questas cumpetenzas en la furmaziun da persunas d’instrucziun è in’incumbensa impurtanta da la societad. La SAP dal Grischun nizzegia la midada digitala per la furmaziun, spezialmain en ils champs matematica, informatica, scienzas natiralas e tecnica. En il center stattan en quest connex las enconuschientschas da la perscrutaziun e dal svilup dal rom e da la didactica dal rom sco era quellas da las cooperaziuns cun las scolas e cun l’economia. La finamira è da scolar persunas d’instrucziun cumpetentas e conscientas da la responsabladad, da las perfecziunar e da las colliar ina cun l’autra.  

Kontakt

Ihr Browser (IE 11) ist leider zu alt und wird nicht mehr unterstützt.