La Scola auta da pedagogia festivescha ses 20avel anniversari. Ensemen cun 275 osps envidads ha ella dà ier en in rom festiv in sguard enavos sin sia istorgia e gughegià in sguard en il futur da la furmaziun da scolastas e scolasts. Per ina retrospectiva ed ina prospectiva vai er en la publicaziun festiva "Ina furmaziun d'auta qualitad per tuts". L'ovra da 144 paginas sa drizza a tuts ch’èn s’occupads da l'istorgia da la SAP dal Grischun e da la furmaziun da las persunas d'instrucziun en Svizra. Per engraziar a la societad, ha la SAP dal Grischun intermedià durant l'onn da giubileum ad uffants da 20 famiglias durant in semester agid da far ils pensums.
La Scola auta da pedagogia dal Grischun festivescha ses 20avel giubileum. Dapi sia fundaziun ha la scola auta promovì e caracterisà a moda singulara l'instrucziun e la lavur da las scolastas e dals scolasts en il chantun Grischun. En il center da sias activitads stattan l'emprender, l'instrucziun ed il svilup.
Ils 20 d'october 2003 ha la Scola auta professiunala da pedagogia cumenzà il manaschi da studi cun totalmain 59 studentas e students. Igl è stà in eveniment impurtant. Pertge che fin lura è la gronda part da las persunas d'instrucziun vegnida scolada a l'uschenumnà seminari da scolastas e scolasts. Da porscher la furmaziun da scolastas e scolasts en il Grischun sco studi terziar, per correspunder al svilup svizzer envers la terziarisaziun da la furmaziun da scolastas e scolasts, è stà in pass impurtant collià cun ulteriurs process da refurma en il sectur da furmaziun. La basa per l’instituziun da la SAP en il chantun Grischun è stada ina votaziun chantunala da l'onn 1998, tar la quala las votantas ed ils votants grischuns han approvà la lescha davart la Scola auta professiunala da pedagogia.
Quai ch'ha cumenzà avant 20 onns cun la transiziun da las differentas instituziuns da furmaziun da scolastas e scolasts sco era dal Seminari scolastic dal Grischun a la Scola auta professiunala da pedagogia dal Grischun, è sa sviluppà ad ina scola auta moderna. La SAP dal Grischun dal temp dad oz è accreditada instituziunalmain, ses studis èn renconuschids, sias purschidas da la furmaziun supplementara resguardan ils basegns multifars en las scolas, ses resultats da perscrutaziun chattan attenziun naziunala ed internaziunala, ella tira a niz la midada digitala e sa sviluppa cuntinuadamain vinavant sco scola auta moderna. Oz scolescha la SAP dal Grischun a Cuira passa 500 studentas e students – e quai en tudestg, rumantsch e talian. Cun quai è ella l'unica scola auta trilingua en la cuntrada da furmaziun da la Svizra.
Ier saira è vegnì festivà il giubileum da 20 onns da la Scola auta da pedagogia dal Grischun ensemen cun 275 osps envidads. "Igl è stà in engraziament a tut quellas e quels che han accumpagnà la SAP dal Grischun durant ils ultims 20 onns: collavuraturas e collavuraturs da pli baud ed oz sco era represchentantas e represchentants da la furmaziun, da la politica, da la scienza e da l'economia", uschia il rectur Gian-Paolo Curcio. La festa da giubileum ha dà la chaschun da guardar cuminaivlamain enavos sin il passà plain eveniments da la Scola auta da pedagogia e da dar a medem temp in sguard en il futur. Il pled festiv ha tegnì il cusseglier guvernativ grischun Jon Domenic Parolini.
Per il giubileum da 20 onns engrazia la SAP dal Grischun a la populaziun cun sustegnair 20 scolaras e scolars dal Grischun tar lur pensums da chasa. Per quest intent han pudì vegnir intermediads durant in semester 20 studentas e students da la SAP dal Grischun. La tscherna da las scolaras e dals scolars che han pudì profitar da questa purschida è vegnida fatga cun trair la sort a chaschun da la festa d'advent 2022.
A chaschun da las festivitads è per l'emprima giada era vegnida preschentada la publicaziun festiva "Ina furmaziun d'auta qualitad per tuts" scritta da perditgas dal temp e dad experts. Els laschan reviver il passà cun lur raquints e regurdientschas persunalas e dattan invista en ils fatgs da la politica da furmaziun dals ultims 20 onns e lur influenza sin la Scola auta da pedagogia. L'emprim exemplar è vegnì surdà venderdi saira da Gian-Paolo Curcio al cusseglier guvernativ grischun.
Ultra da l'istorgia da la Scola auta da pedagogia, tracta l'ovra da 144 paginas era dumondas actualas da la furmaziun da persunas d'instrucziun ed il futur da l'instituziun da furmaziun grischuna. Ella sa drizza a tut quellas e quels che s'interessan per la SAP dal Grischun en spezial e per la furmaziun da las scolastas e dals scolasts en Svizra.
La publicaziun festiva preschenta en quatter parts l'istorgia dal svilup da la scola auta en il context da la terziarisaziun da la furmaziun da las persunas d'instrucziun en l’entira Svizra da l'onn 1995 fin oz. Per finir ristgan il president dal cussegl da la scola auta, Hans Peter Märchy, ed il rectur da la Scola auta da pedagogia dal Grischun, Gian-Paolo Curcio, da dar in sguard en il futur da la furmaziun da scolastas e scolasts.
La publicaziun festiva è vegnida publitgada da la chasa editura Hep e stat a disposiziun a partir dal 1. da settember gratuitamain sco Open Access-File a tut las interessadas e tut ils interessads sut phgr.ch/publicaziun-festiva u sa vegnir empustada sut hep-verlag.ch/hochwertige-bildung.
La publicaziun festiva per il giubileum da 20 onns da la Scola auta da pedagogia dal Grischun è in ulteriur punct culminant durant l'onn da giubileum. L'ovra da 144 paginas na tracta betg be l'istorgia da la scola auta. El serra cun in sguard vers il futur e cun in quint da model che skizzescha ina varianta da la furmaziun da scolastas e scolasts enturn il 2035.
ulteriuras infurmaziuns
Wissenschaftliche Mitarbeiterin III, als Leiterin Marketing & Kommunikation
Ihr Browser (IE 11) ist leider zu alt und wird nicht mehr unterstützt.