Rapport annual 2024

La SAP dal Grischun preschenta in rendaquint positiv per il 2024

Il resultat annual positiv sa basa sin differents facturs

Plirs svilups han contribuì al resultat annual positiv da la SAP dal Grischun: La quota da las studentas e dals students cun domicil ordaifer il chantun Grischun è s’augmentada da 45 sin 47 pertschient, cumpareglià cun l’onn precedent. Cun quai èn s’augmentadas las entradas da la cunvegna davart las scolas autas spezialisadas. A medem temp è la contribuziun chantunala vegnida augmentada supplementarmain per il 1. da schaner 2024 pervi da la cumpensaziun da chareschia. Ulteriuras entradas da 0.4 milliuns francs han cumplettà il quint da la Scola auta da pedagogia dal Grischun grazia a projects da perscrutaziun, da svilup e da servetschs.

Al retgav da gestiun da 28.3 milliuns francs stattan visavi custs da 27.6 milliuns francs. Il pitschen augment dals custs è il resultat da mesiras da spargn sistematicas per cuvrir ils custs supplementars. Che plazzas vacantas n’èn betg vegnidas occupadas ha surtut gidà a reducir ils custs.

Passa 600 studentas e students han cumenzà il nov semester

Il dumber da studentas e students è sa stabilisà sin in aut nivel; il dumber d’entradas novas è sa reducì in zic. Il semester d’atun 2024 han 609 studentas e students studegià a la SAP dal Grischun; 160 en l’emprim semester (2023: 197). Totalmain èn immatriculadas 476 persunas en in studi da bachelor. Il studi Scola primara (1.–6. classa) cun 116 novas annunzias è anc adina fitg popular, suandà dal studi Scolina e scola primara (1. –2. classa) cun 29 novas annunzias. Cumpareglià cun ils davos onns, resta la repartiziun da las linguas stabila cun 107 studentas e students da lingua tudestga, 13 studentas e students da lingua rumantscha e 25 studentas e students da lingua taliana.
En ils studis da master han 15 studentas e students cumenzà lur studi sco persuna d’instrucziun dal stgalim secundar I u sco persuna d’instrucziun dal stgalim secundar I e scolas da maturitad. Totalmain èn 43 studentas e students s’inscrits per il studi da master consecutiv ch'è vegnì introducì avant dus onns.

Ultra da quai porscha la SAP dal Grischun dus studis da master consecutivs en cooperaziun cun la Scola auta interchantunala per pedagogia curativa (HfH) e cun la SAP da Son Gagl. 27 persunas han cumenzà il studi Pedagogia curativa da scola (SHP). Il studi supplementar per acquistar la qualificaziun d’instruir per ulteriurs onns da scola (Stgalim secundar I) frequentan actualmain 15 persunas d’instrucziun da la scola primara. 

Rapport annual 2024 stat a disposiziun online

L’entir rapport annual 2024 cun las cifras detagliadas e cun invistas en ils differents prorectorats stat a disposiziun a partir d’immediat online sut: Rapport annual 2024.