Suenter ina fasa da pilot reussida po la Scola auta da pedagogia dal Grischun (SAPGR), en cooperaziun cun la Scola auta interchantunala per pedagogia curativa Turitg (HfH), sviluppar vinavant la purschida da studi en il champ da la pedagogia curativa da scola a Cuira. La regenza dal chantun Grischun ha dà glisch verda per transferir il project da pilot en ina purschida da studi regulara.
Il settember 2022 è vegnì lantschà in project da pilot per cumbatter la mancanza da pedagogas e pedagogs curativs en il chantun Grischun. La regenza grischuna aveva decidì quella giada d’abolir la limitaziun da plazzas da studi e da realisar ina purschida da studi flexibilisada ensemen cun la SAP dal Grischun e cun la HfH, per s’occupar anc meglier dals basegns da las studentas e dals students e da las scolas. Sin fundament da las experientschas positivas, che las instituziuns han fatg en la fasa da pilot, vegn il studi da master Pedagogia curativa da scola transferì anticipadamain en ina purschida da studi regulara ed etablì permanentamain al lieu da studi Cuira.
Tras l’aboliziun da la limitaziun da plazzas e tras la nova concepziun da la purschida da studi è il dumber da studentas e students s’augmentà per pli ch’il dubel dapi il cumenzament dal project l’onn 2022. Actualmain èn 75 studentas e students s’inscrits per il studi da master Pedagogia curativa da scola. Cun 35 annunzias per il cumenzament dal studi il settember 2025, vegn il dumber da studentas e students anc ina giada a s’augmentar cleramain.
Il studi da master Pedagogia curativa da scola sa distingua tras ina gronda flexibilitad: Las studentas ed ils students pon studegiar a temp cumplain u cumplementarmain a la professiun. Las studentas ed ils students concepeschan lur studi individualmain grazia a la flexibilitad temporala, tematica e locala.
Ils 13 da matg 2025 ha lieu in’occurrenza d’infurmaziun online davart il studi da master Pedagogia curativa da scola a la SAP dal Grischun. Ulteriuras infurmaziuns sut phgr.ch.
Pedagogas e pedagogs curativs da scola instrueschan, accumpognan e promovan scolaras e scolars cun basegns da furmaziun spezials. En quest connex collavuran els stretgamain cun persunas d’instrucziun, cun expertas ed experts e cun geniturs. Il studi da master collia svilups actuals da la pratica cun enconuschientschas scientificas.
ulteriuras infurmaziuns
Ils studis da master a la SAP dal Grischun sa drizzan a differentas gruppas d’interess: studis da master per futuras persunas d’instrucziun dal stgalim secundar I (e scolas da maturitad), per pedagogia curativa da scola sin stgalim primar e secundar sco er in project da cooperaziun da differentas scolas autas en il champ dal svilup da la scola. Ensemen cun ils studis da bachelor per il stgalim primar cuvran els in grond champ da l’ambient da scola.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.