Communicaziun a las medias

Da l’instrucziun primara a l’instrucziun secundara

Il studi da trais onns a temp parzial «Master stgalim secundar I: per persunas d’instrucziun dal stgalim primar» cumenza ils 7 da settember 2026. Il studi vegn realisà la terza giada suenter ils onns 20–23 e 23–26. Cun dus dis da preschientscha per emna sa drizza il studi tenor ils basegns da las persunas d’instrucziun activas en la professiun. Var 60 pertschient da la scolaziun ha lieu a la SAP dal Grischun, inclus la furmaziun pratica professiunala. Singulas occurrenzas – surtut en ils studis d’approfundaziun – vegnan realisadas en cooperaziun cun la SAP da Son Gagl a Gossau u a Son Gagl.

Il studi è fitg individualisà e sa basa sin l’experientscha d’instrucziun da las participantas e dals participants. Las persunas d’instrucziun da la scola primara pon sa qualifitgar sistematicamain per ina midada posteriura sin il stgalim secundar I. 

I dat dentant era la pussaivladad d’instruir gia durant il studi sin il stgalim superiur. La scolaziun vegn terminada cun in Master of Arts respectivamain cun in Master of Science in Secondary Education. Il diplom è renconuschì da la Conferenza da las directuras e dals directurs chantunals da l’educaziun publica (CDEP) e vala en l’entira Svizra.

Cun la contribuziun sustegna il chantun la qualificaziun da persunas d’instrucziun cun experientscha e gida a sminuir la mancanza da persunal qualifitgà.