La Scola auta da pedagogia dal Grischun na scolescha betg mo persunas d'instrucziun, mabain s'engascha er activamain per la furmaziun professiunala. Ina giada l'onn envida ella giuvenils ad in di da fufragnar en las differentas professiuns. Mez avrigl èsi puspè stà uschè lunsch.
Il di da fufragnadi 2026 a la SAP dal Grischun è stà era quest onn in’occurrenza ordvart gartegiada. Numerus giuvenils interessads e motivads han nizzegià la chaschun d’emprender d’enconuscher ils differents emprendissadis e da survegnir in'invista autentica en il mintgadi professiunal.
Spezialmain legraivel è stà il grond engaschi da nossa emprendista e da noss emprendists che han organisà ed accumpagnà il di. Cun bler plaschair e cumpetenza han els intermedià lur enconuschientschas e pussibilità a la fufragnanta ed als fufragnants invistas captivantas e datiers da la pratica en l'emprendissadi a la SAP dal Grischun. Quest barat direct sin il medem nivel è fitg prezius per ina tala occurrenza.
La finamira dal di da fufragnadi è da sustegnair ils giuvenils en lur tscherna da professiun e d’als dar gia baud invista en il mund professiunal. Cun sa participar activamain, cun discurs persunals e cun far experientschas praticas survegnan las participantas ed ils participants in'orientaziun impurtanta per lur futur. Igl è stà ordvart bel da vesair cun quant entusiassem che tant ils giuvenils sco era nossa emprendista e noss emprendists han passentà il di. L'occurrenza ha mussà ina giada dapli quant impurtants che tals inscunters èn – e quant prezius ch'igl è d'accumpagnar persunas giuvnas sin lur via en il mund professiunal.
Aitana Barahona, emprendista commerzianta 3. onn d’emprendissadi
«Per mai èsi stà in’experientscha captivanta e preziusa da sa schluitar sezza ina giada en la rolla da la persuna d'accumpagnament. I m’ha fatg plaschair da dar als giuvenils in’invista en nossa scolaziun sco er en il mintgadi da lavur varià a la SAP dal Grischun. Spezialmain bel èsi stà da vesair quant interessads ed averts che la participanta ed ils participants èn stads e che nus als avain pudì sustegnair tar lur tscherna da professiun.»
Elia Melliger, emprendist spezialist d’ICT 2. onn d’emprendissadi
«Per mai è il di da fufragnadi stà fitg interessant. Igl è stà l’emprima giada che jau hai accumpagnà persunas e preschentà ad ellas mia lavur. Igl è stà ina grondiusa experientscha da lavurar ensemen cun la fufragnanta ed ils fufragnants e da pudair sentir directamain lur interess per nossa professiun. Jau sper che nus hajan pudì gidar vinavant la fufragnanta ed ils fufragnants sin lur via en il mund da lavur.»
Diego Tönz, emprendist informaticher svilup d’applicaziun 2. onn d’emprendissadi
«Jau hai gì grond plaschair da mussar a la fufragnanta ed als fufragnants ils exercizis e d’als gidar en cas da problems. Cunquai che jau sai anc ma regurdar fitg bain co ch’igl era a l’entschatta, hai jau pudì ma metter bain en lur situaziun. Il pli grond plaschair hai jau gì, cura che jau hai vis tar ils giuvenils il mument ch’i ha fatg clic e ch’els avevan plaschair vi da l’informatica. Tut en tut èsi stà in super di ed ina grondiusa experientscha per mai.»
Ulteriuras infurmaziuns sut: phgr.ch/berufsbildung
Far l’emprendissadi a la Scola auta da pedagogia dal Grischun? Natiralmain va quai! Tar nus na savais Vus betg be sa scolar e sa perfecziunar sco persuna d’instrucziun, dentant er absolver in emprendissadi en trais differentas professiuns.
ulteriuras infurmaziuns
Projektmitarbeiterin, als Assistentin des Verwaltungsdirektors
Ihr Browser (IE 11) ist leider zu alt und wird nicht mehr unterstützt.