Camps da stad 2026

Vacanzas e creativitad van maun en maun

Dals 3 fin ils 6 d'avust 2026 daventa il campus da la SAP dal Grischun in lieu per experimentar e crear. Las scolaras ed ils scolars pon tscherner tranter duas purschidas da vacanzas: ils i-CAMPs per fans da la tecnica ed il camp da scriver per giuvnas inventadras ed inventaders d’istorgias.

i-CAMPs: Roboters, codes ed atgnas ideas
Tar ils i-CAMPs construeschan e programmeschan uffants e giuvenils da la 3. fin 9. classa roboters da LEGO, schlian incumbensas cumplitgadas e realiseschan agens projects. En il center stattan la mirveglia, la creativitad ed il curaschi d’empruvar insatge nov.

«Nus mussain als uffants ed als giuvenils che las tecnologias digitalas n’èn betg mo interessantas, mabain era creativas», di Parvaneh Babari, manadra dal project dals i-CAMPs. Enconuschientschas preliminaras n’èn betg necessarias – dumandads èn il spiert d’exploraziun ed il plaschair d’empruvar.

Camp da scriver: Pleds che stgaffeschan munds 
Tgi ch’experimentescha pli gugent cun lingua, è en il dretg lieu en il camp da scriver. Sut la direcziun d’ina autura e pedagoga da scriver, sviluppan las participantas ed ils participants atgnas istorgias, figuras ed ideas.

«Qua na datti naginas correcturas cun fieuters cotschens. En il center stattan la fantasia, la creativitad ed il plaschair da scriver», di Irina Lutz, cunorganisatura dal camp da scriver. Or dad emprims patratgs naschan texts captivants, leghers u surprendents – e magari schizunt munds dal tuttafatg novs.

Omadus camps cumbineschan emprender cun far vacanzas e mussan: las meglras ideas naschan savens lura, cura ch’ins cumenza simplamain.