La fin da mars han 27 absolventas prendì encunter lur diploms da master a la scola auta da pedagogia dal Grischun.
La festa da diplom ha apprezià las prestaziuns da las novas pedagogas curativas da scola. Durant il studi han ellas collià las enconuschientschas acquistadas cun lur lavur da mintgadi ed han uschia pudì contribuir essenzialmain ad ina scola populara solida en il futur.
Las duas persunas responsablas per il studi Irene Gehrig ed Arno Ulber han manà tras l'occurrenza festiva. L'autur grischun Philipp Gurt ha accentuà l'impurtanza dal princip dals quatter M «Ins sto avair gugent umans» (Man muss Menschen mögen» per la lavur cun uffants e giuvenils che na correspundan betg adina a las aspectativas generalas da la societad.
Reto Givel-Bernhard, rectur da la Scola auta dal Grischun e Claudia Ziehbrunner, manadra dal center da scolaziun e furmaziun supplementara a la Scola auta per pedagogia curativa, han tractà en lur salids temas centrals sco la rolla da las pedagogas e dals pedagogs e l'integraziun. Musicalmain han Franco Mettler (clarinetta) e Thomas Weber (accordeon) enritgì la festa.
La Scola auta da pedagogia dal Grischun e la Scola auta interchantunala per pedagogia curativa Turitg che realiseschan il studi en cooperaziun, gratuleschan a las diplomandas da cor per lur grond success ed engrazia a tut las persunas che han gidà d'organisar l'occurrenza.
Pedagogas e pedagogs curativs da scola instrueschan, accumpognan e promovan scolaras e scolars cun basegns da furmaziun spezials. En quest connex collavuran els stretgamain cun persunas d’instrucziun, cun expertas ed experts e cun geniturs. Il studi da master collia svilups actuals da la pratica cun enconuschientschas scientificas.
ulteriuras infurmaziuns
Ils studis da master a la SAP dal Grischun sa drizzan a differentas gruppas d’interess: studis da master per futuras persunas d’instrucziun dal stgalim secundar I (e scolas da maturitad), per pedagogia curativa da scola sin stgalim primar e secundar sco er in project da cooperaziun da differentas scolas autas en il champ dal svilup da la scola. Ensemen cun ils studis da bachelor per il stgalim primar cuvran els in grond champ da l’ambient da scola.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.