Invista en ils differents champs da professiun

Di da fufragnadi a la SAP dal Grischun 

Dus da trais giuvenils sa decidan per ina scolaziun professiunala da basa ch'è il fundament per l'emprender per vita duranta e che avra differentas perspectivas professiunalas. I dat bleras pussaivladads. Tenor il Secretariat da stadi per furmaziun, perscrutaziun ed innovaziun (SFP) stattan a disposiziun var 245 professiuns per ils giuvenils che sortan da la scola.

"La schelta da differentas professiuns è effectivamain gronda e savens n'han ils giuvenils betg enconuschientschas fundadas davart las differentas gruppas professiunalas", di Dinesh Rajakaruna, directur administrativ a la SAP dal Grischun. Cun il di da fufragnar per professiuns cun emprendissadi che ha lieu ina giada ad onn, vul la scola auta dar la pussaivladad als giuvenils d'emprender d'enconuscher differentas professiuns e quai a moda teoretica sco era pratica. Els vegnan accumpagnads da pliras persunas responsablas per la furmaziun ed emprendistas ed emprendists da la SAP dal Grischun.

Ils 25 d'avrigl 2024 èsi stà uschè lunsch. La scola auta ha avert sias portas per giuvenils che sa chattan amez il process da la tscherna da professiun. 15 scolaras e scolars da la regiun Cuira han nizzegià la chaschun da sfunsar durant in di en differentas professiuns e d'emprender d'enconuscher il mintgadi da lavur a la Scola auta da pedagogia: sco commerziant:a, sco informaticra/informaticher en direcziun svilup d'applicaziuns, spezialist:a per infurmaziun e documentaziun, spezialist:a dad ICT. "Cun questa acziun promovain nus activamain la furmaziun da giuvens emprendists e giuvnas emprendistas e mussain responsabladad sociala. Plinavant vegnan emprendistas ed emprendists era cun in nov vent en nossa scola auta e procuran per ina structura da vegliadetgna equilibrada", uschia Rajakaruna. Per la SAP dal Grischun è la furmaziun d'emprendists ed emprendistas per quest motiv era in'investiziun preziusa en il futur, betg sulettamain perquai che la furmaziun professiunala è fitg impurtanta en la vita da blers giuvenils, mabain perquai ch'ella è ina mesira efficazia per cumbatter proactivamain la mancanza actuala da persunal qualifitgà.