Orbita s’orientescha al Plan d’instrucziun 21 ed è uschia orientà a l’instrucziun e l’emprender che sa basan sin las cumpetenzas. Il med d’instrucziun pussibilitescha d’exercitar ils sis champs da cumpetenza menziunads en il Plan d’instrucziun 21 e promova uschia las quatter cumpetenzas linguisticas (tadlar e chapir, discurrer, scriver e leger) sco era las abilitads metalinguisticas e culturalas (conscienza linguistica e schientscha litterara).
Orbita s cumpona d’in cudesch d'instrucziun e d’in carnet da lavur en furma da palpiri per mintga classa. Tant il cudesch d’instrucziun sco er il carnet da lavur èn dividids en 10 unitads d’emprender. Per il stgalim secundar èn previs dus carnets da lavur per classa che resguardan ils differents nivels da las cumpetenzas.
Il commentari per las persunas d’instrucziun stat a disposiziun en furma digitala. El cuntegna infurmaziuns essenzialas ch'èn necessarias per in diever adequat dal med d’instrucziun. Il commentari è dividì en duas parts. L’emprima part cuntegna indicaziuns generalas, renviaments al plan d’instrucziun e la basa didactica per emprender talian. La segunda part cun il titel Bussola cuntegna propostas concretas per l’introducziun da las singulas unitads sco era per la realisaziun e per la differenziaziun, er en ina perspectiva da pliras classas.
Materialias cumplementaras stattan a disposiziun en furma digitala. Ellas servan a la differenziaziun e resguardan ils basegns da las scolaras e dals scolars.
Il Manual per la reflexiun linguistica vegn a star a disposiziun a las scolaras ed als scolars a partir da la 4. classa en furma da palpiri.
Shop:
Orbita pon ins empustar online tar l'Uffizi per la scola populara ed il sport (USS)
