En il discurs realisesch jau svelt ch’in giuven ambizius ed engaschà sesa davant mai. Ivo raquinta da ses emprendissadi sco commerziant ch’el ha terminà il 2012. Suenter ha il student, che frequenta il segund onn da studi, absolvì il militar, è viagià in mez onn enturn il mund, ha prendì suenter la maturitad professiunala ed ha suenter giudì la segunda part da ses grond viadi.
L’onn 2015 ha Ivo Orlik lura cumenzà sia lavur sco moderatur da radio tar RTR. Durant tschintg onns ha el divertì mintga di la glieud, creà contribuziuns interessantas, manà intervistas, moderà la parada da hits e legì nundumbraivlas novitads.
Ivo sa regorda da quest temp cun ils pleds: “Igl è stà in super temp!” Sin la dumonda, sch’el laschia mintgatant encrescher per questa lavur respunda el cun in surrir: “Per cletg hai jau anc mintgatant da quests engaschaments e fatsch adina puspè contribuziuns da radio tar temas etics e producesch era vinavant formats da video per RTR”.
Suenter ses temp sco moderatur ha il futur scolast lavurà durant dus onns tar l’agentura Rob Nicolas sco creative director/manader da project. Là è el anc adina engaschà, lavura era actualmain vi da projects pli pitschens e finanziescha uschia ses studi.
Dapi 2012 lavura Ivo Orlik sco musicist. Il student vegn per in mument fitg serius e raquinta: “Jau hai adina fatg questa lavur sper tut il rest. Igl ha dà fasas, nua che jau hai lavurà 150 % e dapli. Durant quest temp hai jau gì pliras perditas andetgas da l’udida e quai ha dà da studegiar. Jau guard oz dapli sin mia sanadad e sin in bun equiliber. Quai hai jau propi stuì emprender.” Suenter ina curta pausa agiunta Ivo in zic pensiv, dentant era losch: “Natiralmain datti era oz anc fasas da stress, sco per exempel durant las emnas d’examens, aber jau hai emprendì da reducir tschellas activitads durant questas fasas intensivas.”
