Communicaziun a las medias

Letizia A. Ineichen è la nova prorectura furmaziun a la SAP dal Grischun

Actualmain maina la pedagoga da musica promovida la partiziun cultura e sport da la citad da Lucerna. Avant ha ella instruì 14 onns en scolas primaras, secundaras e chantunalas e 10 onns a la Scola auta da pedagogia da Lucerna. Parallelamain ha ella sviluppà meds d’instrucziun e furmaziuns supplementaras ed accumpagnà studentas e students en la pratica professiunala. Ella ha in diplom d’instrucziun per la scola primara e per il stgalim gimnasial, dus masters en musica ed in master en business administration. Ella ha doctorà davart la professiunalisaziun da persunas d’instrucziun dal stgalim primar en il rom musica a la LMU da Minca.

Il favrer 2025 surpiglia Letizia Ineichen il prorectorat furmaziun da Reto Givel che surpiglia il november 2024 il rectorat da la Scola auta da pedagogia dal Grischun da Gian-Paolo Curcio. Gian-Paolo Curcio mida sco rectur a la Scola auta spezialisada dal Grischun.

Letizia Ineichen prenda posiziun sco suonda: «La SAP dal Grischun è unica pervi da sia structura, sia impurtanza e sia responsabladad envers in chantun pluriling cun ina gronda varietad culturala. Jau ma legrel zunt fitg da surpigliar questa funcziun da gronda responsabladad per la furmaziun da scolastas e scolasts ch’è orientada vers il futur e da la crear ensemen cun ils differents partenaris.»

Sco prorectura furmaziun è Letizia Ineichen responsabla per ils studis da tut ils stgalims da scola: il studi scolina/scola primara, il studi a temp cumplain ed il studi a temp parzial da la scola primara, il studi scola secundara per persunas d’instrucziun dal stgalim primar, il studi scola secundara per persunas cun in bachelor spezialisà sco er il studi cumbinà scola secundara/scolas da maturitad per persunas cun in master spezialisà.