Il viadi professiunal impressiunant da Gianmarco Corsetto reflectescha, sper il svilup persunal, era la midada da la cuntrada da furmaziun en Svizra. Dal cumenzament sco miradur sur la lavur sco scolast fin al post sco manader da scola: la carriera da Corsetto na stat betg mo per ambiziuns individualas, mabain per las pussaivladads che sa porschan per las persunas d'instrucziun tras furmaziuns supplementaras e tras in svilup differenzià da la carriera.
Il sistem da furmaziun svizzer sco model da success vegn caracterisà da differents facturs. Sper la qualitad da las scolas publicas, gioga la pussaivladad da sa mover tranter ils differents stgalims da furmaziun ina rolla impurtanta. Concretamain èn quai la participaziun a differents programs da furmaziun, il passadi da la furmaziun professiunala a la furmaziun universitara u l'opziun da midar il job durant la carriera professiunala. La carriera da Gianmarco Corsetto è in grondius exempel per quai.
La famiglia da Gianmarco Corsetto deriva da l'Italia. Ses antenats han lavurà sin il bajetg, bab, basat ed aug eran tuts miradurs. Per Gianmarco pareva la via gia definida ed el è sa decidì per in emprendissadi da miradur, era perquai ch’el aveva in pau avunda da la scola. Betg ina tscherna definitiva, co ch’igl è sa mussà pli tard, dentant ina buna scola da la vita.
La scolaziun era pretensiusa: ina demananza groppa tranter ils collegas, il squitsch da prestaziun quotidian e da tutt'aura ordadora. Oz profitescha el da questas experientschas: perseveranza e resolutezza al gidan bler en sia lavur. Suenter avair terminà l'emprendissadi ha Gianmarco Corsetto midà patrun, quel ha sustegnì ses plans per ina furmaziun supplementara. Dueva el ir en direcziun polier u plitost manader da construcziun? Tuttenina ha el realisà quants auters champs professiunals ch’al stattan avert.
Sia derivanza sco uffant dad immigrants talians al ha servì sco impuls. El vuleva vegnir vinavant en la professiun, surpigliar responsabladad. Prest era naschida l'idea da far – suenter il curs preliminar a Schiers – il studi da bachelor sco persuna d'instrucziun per la scola primara a la SAP dal Grischun. Fin oz sa senta Gianmarco Corsetto da chasa en l'ambient da scola.
Durant otg onns sco persuna d'instrucziun a Landquart ha Corsetto rimnà experientschas preziusas. "Era sco scolast hai jau adina empruvà da vegnir vinavant. Ina giada sun jau stà responsabel per il stgalim, ina giada hai jau pudì surpigliar singulas incumbensas da la direcziun da scola. Era qua sun jau stà insacura conscient: jau vi far il proxim pass."
Da s’annunziar per ina plazza da manader da scola, ha era muntà da bandunar la zona da confort. La vista ch'el pudess adina turnar en sia anteriura lavur sco scolast al ha gidà da decider. Oz na stat el betg mal d’avair fatg quest pass ed è dapi trais onns manader da scola a Churwalden.
Sper sia rolla sco manader da scola, s'engascha Corsetto en la suprastanza da la Federaziun da mainascolas dal Grischun. El planisescha da cumenzar il studi da master svilup da la scola che la SAP dal Grischun porscha en collavuraziun cun autras scolas autas. Sa perfecziunar è in regal per Gianmarco Corsetto.
Las pussaivladads da carriera da persunas d'instrucziun èn sa concretisadas en Svizra cun il svilup da las scolas autas da pedagogia e cun la purschida adina pli differenziada da studis da furmaziun supplementara (CAS, DAS, MAS) "Tenor experientscha na vulan bleras persunas d'instrucziun betg sa distatgar dal tut dal champ professiunal da la scola. Ellas tschertgan plitost in supplement da l'activitad en l'instrucziun u ch'ellas emprovan d'integrar lur experientscha en in'autra funcziun en il manaschi da scola e da furmaziun", uschia Karin Lutz, manadra da curs e scolaziuns a la SAP dal Grischun. Las scolas autas porschan perquai era furmaziuns supplementaras orientadas a la professiun, che n’èn betg subvenziunadas dal maun public, che pussibiliteschan d'acquistar ulteriuras u novas enconuschientschas e cumpetenzas. Ellas sa drizzan a persunas cun in emprim diplom d'ina scola auta u cun ina furmaziun equivalenta che han per regla gia in'experientscha professiunala da plirs onns.
Schulleiter:innen setzen Impulse. Sie begreifen Schule als attraktiven Lern- und Bildungsraum und verstehen es, bestehende und zukünftige Anforderungen im Bildungssystem mit den Mitarbeitenden erfolgreich anzupacken. Als Schulleiter:in gestalten Sie Veränderungsprozesse und unterstützen kooperative, wirksame und ressourcenorientierte Lösungen.
ulteriuras infurmaziuns
Midadas socialas influenzeschan las scolas ed èn ina sfida per ellas. Sco sviluppadra/sviluppader da la scola participais Vus da maniera activa d’iniziar pass da svilup e da definir novs process. Il studi da master svilup da la scola en cooperaziun cun autras scolas autas As qualifitgescha sco expertas ed experts dal svilup da la scola sin nivel naziunal ed internaziunal.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.
