L’engaschi persistent è ina part impurtanta da la responsabladad da nossa scola auta. I va per dapli che da sviluppar vinavant il lieu da furmaziun. Era studentas e students sa stentan da promover la persistenza sin differents champs. Conscientamain: Pertge che sco persunas d'instrucziun influenzeschan ellas las generaziuns vegnintas e las sensibiliseschan per las sfidas socialas, ecologicas ed economicas dal futur.
Sco instituziun da furmaziun e da perscrutaziun ha la SAP dal Grischun - sco tut las scolas autas - ina rolla speziala per realisar la promoziun da la persistenza. D'ina vart sa tracti d'intermediar l'idea directiva per in svilup persistent a las studentas ed als students e da concepir las mesiras da realisaziun uschia, che las studentas ed ils students possian gudagnar e mantegnair cun lur participaziun activa experientschas ed enconuschientschas per las transferir en las scolas ed en las classas futuras. Per l'autra sa tracti era da far accessiblas novas perspectivas e da sviluppar vinavant il lieu da furmaziun. [1]
La SAP dal Grischun chapescha il svilup persistent sco in svilup che po cuvrir ils basegns actuals, senza sminuir la pussaivladad da las generaziuns futuras da cuvrir lur agens basegns. [2] En ses agir persequitescha ella l’uschenumnà punct da partenza d'outside-in: Las interpresas e las instituziuns s'orienteschan a quai ch'è necessari or d’ina perspectiva globala e drizzan lur finamiras tenor quai. Uschia fan ellas ina punt tranter lur prestaziun actuala e quai ch'è necessari.
Il rom da referenza per la SAP dal Grischun èn las 17 finamiras da l'agenda 2030 (Sustainable Development Goals, SDGs) da las Naziuns Unidas. Per la perioda da strategia 2021-2024 ha la direcziun da la scola auta decidì da metter il focus sin las suandantas quatter finamiras:
Ils Sustainable Development Goals (SDGs) èn 17 finamiras per in svilup persistent e defineschan terms economics, ecologics e socials che duain vegnir cuntanschids fin l'onn 2030. Els furman il coc da l'agenda 2030, deliberada da tut ils commembers da las Naziuns unidas l'atun 2015. La SAP dal Grischun ha fixà quatter finamiras.
ulteriuras infurmaziuns
Ina part considerabla da l'energia electrica retira la SAP dal Grischun dapi onns da l'agen implant fotovoltaic sin ils tetgs dals edifizis da la scola e dals biros. Durant ils mais da stad producescha l'implant avunda electricitad per cuvrir bunamain tut il basegn d'energia.
Dapi l'onn 2023 gida era la flotta da vehichels da servetsch da la SAP dal Grischun, che va cumplettamain cun electricitad, a trair a niz optimalmain l'electricitad producida. La flotta da vehichels vegn messa a disposiziun en cooperaziun cun Mobility. Cun questa cooperaziun na sustegna la SAP dal Grischun betg mo cun mintga kilometer charrà ulteriurs projects da persistenza entras sia participaziun al fond "Cause We Care". Cun la cumbinaziun dal traffic public e da vehichels da mobilitad per viadis da servetsch pussibilitescha ella er a sias collavuraturas ed a ses collavuraturs da lavurar fitg effizientamain e persistentamain.
[1] Vesair https://www.admin.ch/opc/de/federal-gazette/2020/3681.pdf
[2] Brundtland, 1991 und ARE
Ihr Browser (IE 11) ist leider zu alt und wird nicht mehr unterstützt.
