#HOCHtalentiert:
Tranter tribuna e stanza da scola

Il Grischun Ivo Orlik, era enconuschent sco rapper Giganto, ha publitgà quatter albums da musica, ha dà dapli che 100 concerts ed ha cuntantschì il 5avel plaz da la parada da hits da la Svizra. Cun dapli che 1 milliun streams sin Spotify e youtube tutgan ses texts tar ils songs rumantschs cun il pli grond success. Uss è el a la Scola auta da pedagogia dal Grischun e frequenta il studi sco scolast primar. Lilian Ladner ha fatg in’intervista cun el.

En il discurs realisesch jau svelt ch’in giuven ambizius ed engaschà sesa davant mai. Ivo raquinta da ses emprendissadi sco commerziant ch’el ha terminà il 2012. Suenter ha il student, che frequenta il segund onn da studi, absolvì il militar, è viagià in mez onn enturn il mund, ha prendì suenter la maturitad professiunala ed ha suenter giudì la segunda part da ses grond viadi.

L’onn 2015 ha Ivo Orlik lura cumenzà sia lavur sco moderatur da radio tar RTR. Durant tschintg onns ha el divertì mintga di la glieud, creà contribuziuns interessantas, manà intervistas, moderà la parada da hits e legì nundumbraivlas novitads.

Ivo sa regorda da quest temp cun ils pleds: “Igl è stà in super temp!” Sin la dumonda, sch’el laschia mintgatant encrescher per questa lavur respunda el cun in surrir: “Per cletg hai jau anc mintgatant da quests engaschaments e fatsch adina puspè contribuziuns da radio tar temas etics e producesch era vinavant formats da video per RTR”.

Suenter ses temp sco moderatur ha il futur scolast lavurà durant dus onns tar l’agentura Rob Nicolas sco creative director/manader da project. Là è el anc adina engaschà, lavura era actualmain vi da projects pli pitschens e finanziescha uschia ses studi.

Dapi 2012 lavura Ivo Orlik sco musicist. Il student vegn per in mument fitg serius e raquinta: “Jau hai adina fatg questa lavur sper tut il rest. Igl ha dà fasas, nua che jau hai lavurà 150 % e dapli. Durant quest temp hai jau gì pliras perditas andetgas da l’udida e quai ha dà da studegiar. Jau guard oz dapli sin mia sanadad e sin in bun equiliber. Quai hai jau propi stuì emprender.” Suenter ina curta pausa agiunta Ivo in zic pensiv, dentant era losch: “Natiralmain datti era oz anc fasas da stress, sco per exempel durant las emnas d’examens, aber jau hai emprendì da reducir tschellas activitads durant questas fasas intensivas.”

Cun il num d’artist “Giganto” è il musicist da prest trenta onns sin viadi cun success: “Jau hai publitgà quatter albums, hai cuntanschì il 5. plaz dals charts dad albums, hai dà dapli che 100 concerts ed hai ina fanbase fidaivla e fitg simpatica. Uschia hai jau pudì emprender d’enconuscher grondiusas persunas e rimnar nunditg bellas regurdientschas.”

Per Ivo n’èsi betg ina sfida d’avair differentas pitgas da lavur El è disà d’esser sin via sin differents binaris ed el ha adina fatg musica parallelamain tar tut ses jobs. Sch’ins dumonda Ivo ses recept, lura respunda el cun in surrir: Jau lavur fitg bain sut squitsch. En quests muments ma poss jau focussar cumplainamain e purtar la prestaziun pretendida. Plinavant sun jau ina persuna fitg positiva. Jau ves en tut il negativ surtut il bun e ma regord sulettamain da bels eveniments. Jau hai era emprendì da fidar a las dretgas persunas, da pudair delegar e da betg avair la pretensiun da savair far tut, ins sto mo enconuscher la dretga glieud.”

Ivo ma fa l’impressiun d’esser cun ils pes sin terra ed uschia hai jau vulì savair, sch’il student, che studegia a temp cumplain, n’ha betg vulì ina giada ristgar tut per la musica. El m’ha lura dà d’entellir ch’i na saja betg in’opziun per el da viver ‘mo’ da la musica, perquai che tenor ses avis giaja lura l’entira creativitad a perder e la musica perdia insatge unic.

Jau m’interessesch era co che Ivo ha chattà la via tar la musica ed en quest connex ma raquinta el chaussas che fan surstar. “Quai è stà ina casualitad. Mia sora ha scrit ina chanzun d’amur e laschà quella sin maisa. Jau hai prendì questa chanzun ed hai fatg ordlonder in rap. Quai è stà l’entschatta. Nagin en famiglia n’ha bler da far cun musica, aber uschia hai jau piglià fieu; plitost tard.”

Ins po be avair uschè bler success ed esser uschè engaschà, sch’ins ha in bun ambient e fermas persunas che dattan support. Schend quels pleds guarda Ivo sin mai cun egls glischants ed agiunta: “Mia famiglia e mia amia èn tut per mai. Els m’han sustegnì sin mia entira via e per quai sun jau fitg grat.”

Co van ils constudents e las constudentas enturn cun il musicist che ha success e cun il collega? Ivo surri: “Cun mai vai fitg bain qua a la SAP dal Grischun. Tuts ma sustegnan ed jau sun, ditg sincer, er oz anc in zic il clown da la classa; mes umor tutga tar mai. Jau ma sent responsabel per mes constudents e mias constudentas e guard sin mia moda ch’i giaja bain cun els ed ellas. Per mai èsi impurtant da star en per ils dretgs e quai viv jau. Quai vegn jau lura er a far sco scolast.”

Tar la dumonda co che sia rolla speziala sa mussia lura en ses agir en stanza da scola vegn Ivo puspè in zic pensiv. El raquinta ch’i na saja betg stà uschè simpel per el a l’entschatta. Ils uffants hajan dentant savì differenziar bain tranter “Giganto” ed Ivo Orlik ed uschia n’è quai betg stà in problem suenter la fasa d’emprender d’enconuscher. El pledentia dentant adina quai ed i saja impurtant ad el ch’ils uffants fetschian la differenza tranter scolast e musicist. Sco anteriura manadra da scola hai jau natiralmain vulì savair co ch’el mettia a disposiziun ses knowhow ad in team da scola futur u actual durant ses praticum. Il futur scolast respunda senza ponderar: “Jau vi exnum organisar in musical e manar atras in’emna da project en connex cun musica. Mes siemi fissi da cumponer ed arranschar ina chanzun davent dad A fin Z cun ils kids.” Quai è natiralmain stà exact quai che jau hai vulì udir e quai che m’ha fatg grond plaschair, perquai che tar Ivo sentan ins sia energia che ha la capacitad da muventar bler.

Per il futur scolast datti intginas parallelas tranter instruir e far musica. “Cura che jau stun avant la classa è quai sco sche jau fiss sin tribuna. En omaduas rollas dun jau vinavant insatge ed hai plaschair sche jau vegn d’effectuar insatge positiv en il visavi. I dat dentant era differenzas: Sin tribuna stat il musicist e la musicista en il center. En la stanza da scola è quai auter. Là stattan ils scolars e las scolaras en il center. Sco scolast inscenesch jau activitads d’emprender per che mes scolars e mias scolaras possian emprender e sa sviluppar.”

A la fin da noss discurs vi jau savair, sche Ivo persequiteschia anc ina finamira speziala. El respunda a moda modesta: “Jau hai reussì bler da quai che jau hai vulì. Ussa vegn quai che duai vegnir e la famiglia ha emprima prioritad. Jau sun spanegià tge che vegn e sun avert. Sulettamain ina pitschna chaussa datti anc: Jau vuless gugent far in semester a l’exteriur e meglierar mes englais. Quai fiss impurtant per mai.”

Ivo Orlik, ina persunalitad che fascinescha e ch’inspirescha giuven e vegl cun sia energia senza fin. Jau sun persvasa che nus udin anc bler da Giganto sco era dad Ivo Orlik ed jau giavisch a l’artist sco er al futur scolast vinavant bler plaschair cun sias activitads creativas.

#HOCHinteressant, #HOCHmusikalisch, #HOCHalpin

#HOCHschulstandort: Cuira, la survesaivla

#HOCHtalentiert: Tranter tribuna e stanza da scola

#HOCHalpin: «La finamira resta adina la finamira»

#HOCHschulverantwortung: Engaschà per la persistenza - per oz e per damaun

#Hochmusikalisch: Fitg musicalas e musicals èn paucs, musicalas e musicals perencunter tuts

#HOCHaktuell: "Nus duvrain scolastas e scolasts motivads ed entusiasmads ch’intermedieschan che l'informatica signifitgescha lavur creativa"

#Hochkarätig: Saira tematica davart l’exposiziun Giasts da la politica, economia e furmaziun discuteschan davart la «scola dal futur»

#HOCHgeflogen Da l'aviun en la stanza da classa

#KarriereHOCH: Fatg ina carriera exemplarica: Gianmarco Corsetto (37), manader da scola Churwalden

Contact

Leiterin Fachstelle MINT