Sonda, ils 30 da november 2024, sa transfurma la Scola auta da pedagogia dal Grischun a Cuira en in center per innovaziun e creativitad. Ensemen cun la Scola auta spezialisada dal Grischun e cun la EMS Schiers realisescha ella la concurrenza regiunala da la First Lego League.
Sut il motto “submerged” cumenza il program da furmaziun MINT da la First Lego League ina nova stagiun plain tensiun. Quest onn perscruteschan las participantas ed ils participants las profunditads da l’ocean e sviluppan qua lur abilitads creativas e tecnicas. Uffants e giuvenils en la vegliadetgna tranter 6 e 16 onns han construì en ina lavur preparatorica intensiva models e roboters, han scrit programs e sviluppà soluziuns innovativas. Accumpagnads èn els vegnids da lur coachs u da lur persunas d'instrucziun.
A las 9.00 cumenzan las concurrenzas da la Challenge League: qua sa mesiran ils teams en il Robot-Game e cun lur project da perscrutaziun.
Ils Robot-Games s’extendan durant l’entir di. L’incumbensa: Programmar il roboter da lego construì sez uschia ch’el ademplescha entaifer 2:30 minutas uschè bleras missiuns fixadas sco pussaivel. In highlight spezial da la concurrenza èn ils gieus da mezfinal e final curt avant las 15.30 en l’aula da la SAP dal Grischun.
Ultra da quai han ils teams tschernì en connex cun il tema "submerged" in problem ed han sviluppà ina dumonda da perscrutaziun. Tenor l’exempel da persunas da la scienza han els elavurà ina soluziun per questa dumonda cun agid da retschertgas e cun barats cun expertas ed experts. Questa perscrutaziun e lur design da roboter preschentan ils teams il di da concurrenza avant ina giuria.
Parallelamain a la concurrenza da la Challenge League, preschentan las participantas ed ils participants pli giuvens da l’Explore League ils resultats da lur lavur da perscrutaziun. Models originals e projects captivants mainan il public tras las profunditads dals oceans. Questas preschentaziuns han lieu il suentermezdi al plaunterren.
Tar la First Lego League stattan en il center il divertiment e l’emprender cuminaivel malgrà la concurrenza. L’occurrenza porscha numerusas pussaivladads da sa barattar e da sa laschar inspirar. En il foyer envida il center da MINT da la SAP dal Grischun ils giasts da vegnir sezs activs e da far emprims pass en la programmaziun. A trais staziuns pon els scuvrir a moda ludica il mund sutmarin cun diriger differents models cun il sistem da robotica da l’Explore League. Culinaricamain vegnan ils giasts pupragnads en il restaurant Scaläratreff ed en il Café FLL.
Il di finescha a las 16:30 cun la premiaziun festiva en l’aula. Qua vegnan premiads ils megliers teams da l’Explore e da la Challenge League. Il pled final da l’occurrenza tegnan dr. Reto Givel, rectur da la SAP dal Grischun, prof. dr. Armando Schär, prorectur da la scola auta spezialisada dal Grischun, e Hans-Andrea Tarnutzer directur da la EMS Schiers.
L’occurrenza publica empermetta projects da roboters impressiunants, soluziuns captivantas ed inscunters enritgints per pitschen e grond. Visitai la concurrenza regiunala ils 30 da november 2024 a Cuira ed As laschai entusiasmar per la robotica.
La First Lego League (FLL) è in program internaziunal per la promoziun da MINT che vegn sustegnì dapi l’onn 2008 da la SAP dal Grischun, da la Scola auta spezialisada dal Grischun e da la EMS Schiers. Il program da promoziun ha la finamira d’entusiasmar uffants e giuvenils en in’atmosfera sportiva per la scienza e la tecnologia e d’als facilitar l’access a roms da las scienzas natiralas. Tras il program duain els sviluppar a temp in interess per professiuns d’inschigner u d'IT.
La FLL promova il spiert da team e pretenda dals uffants e giuvenils da chattar soluziuns creativas per incumbensas cumplexas. En quest connex vegn integrà il mund da viver dals uffants, i vegn mussà co vegnir a frida cun sbagls e promovì il pensar analitic e perscrutant.
En il rom dal program construeschan scolaras e scolars da nov fin 16 onns en la categoria Challenge League in roboter cumplettamain automatic per l’uschenumnà “Robot-Game”, nua ch'els ston schliar entaifer 150 secundas pliras incumbensas sin in plaz da gieu fixà. Al di da la concurrenza preschentan els avant ina giuria lur lavur, lur ideas e lur abilitad da lavurar en in team en las categorias "valurs fundamentalas, preschentaziun da la perscrutaziun e design da roboter".
Erleben Sie die ganze Welt der PH Graubünden. Mit unserem E-Newsletter informieren wir Sie regelmässig über aktuelle Bildungsthemen, Neuigkeiten, Veranstaltungen, Messen, Kurse, Lehrgänge und vieles mehr. Melden Sie sich jetzt an.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.