Onur academica a la SAP dal Grischun

Il cussegl da la scola auta da pedagogia dal Grischun ha surdà a trais commembers da la direcziun da la scola auta il titel da professer: dr. Reto Givel-Bernhard (rectur), dr. Silvia Deplazes (prorectura furmaziun cuntinuada & servetsch) e dr. Letizia A. Ineichen (prorectura furmaziun).

En in rom festiv ha dr. Hans Peter Märchy surdà mesemna saira a trais commembers da la direcziun da la scola auta il titel da professer.

Prof. dr. Reto Givel-Bernhard, rectur
Reto Givel-Bernhard ha terminà l’onn 1995 il seminari da scolastas e scolasts St. Michael a Zug. Suenter in curt temp sco scolast primar, ha el studegià filosofia a l’universitad da Berna e suenter segiurns en differentas universitads da l’exteriur, ha el promovì davart in tema metaetic. Suenter plirs onns post doc, ha el alura lavurà sco coordinatur dal project per l’armonisaziun da las scolas en il chantun Basilea-Citad, sco secretari dal departament da sanadad e da l’ambient da la citad da Turitg e sco manader da las scolas medias en la direcziun da furmaziun dal chantun Turitg. Parallelamain ha Reto Givel-Bernhard absolvì differentas furmaziuns supplementaras, tranter auter in Executive MBA en Public Management. Dapi bun tschintg è el commember da la direcziun da la Scola auta da pedagogia dal Grischun. L’emprim en la funcziun dal prorectur furmaziun, dapi il 1. da november 2024 sco rectur.

Prof. Dr. Silvia Deplazes, prorectura furmaziun cuntinuada & servetsch
Silvia Deplazes ha fatg la scolaziun da mussadra a la Scola da dunnas dal Grischun ed ha instruì divers onns a la scolina rumantscha a Sagogn. Silsuenter ha ella studegià psicologia ed ha lavurà en il champ da la promoziun da la sanadad a l’Universitad/SPF da Turitg. Parallelamain ha ella absolvì in studi supplementar ad in diplom ch’ella ha terminà cun in MBA. Sia promoziun davart il tema coaching ha ella fatg a l’universitad da Kassel. A la ZHAW al departament psicologia applitgada ha ella gì diversas funcziuns – da la direcziun da studi fin a la professura per diagnostica e cussegliaziun. Dapi var tschintg onns è Silvia Deplazes commembra da la direcziun da la Scola auta da pedagogia dal Grischun e sco prorectura responsabla per il champ furmaziun cuntinuada e servetsch.

Prof. Dr. Letizia A. Ineichen, prorectura furmaziun
Letizia A. Ineichen ha manà fin il december 2024 la partiziun cultura e sport da la citad da Lucerna. Avant ha la pedagoga da musica promovida instruì 14 onns a scolas primaras, secundaras e chantunalas e 10 onns a la Scola auta da pedagogia da Lucerna. Parallelamain ha ella sviluppà meds d’instrucziun e furmaziuns supplementaras ed accumpagnà studentas e students en la pratica professiunala. Ella ha in diplom d’instrucziun per la scola primara e per il stgalim gimnasial, ha dus masters en musica ed in master en Business Administration. Ella ha doctorà davart l’artitgel constituziunal 67a furmaziun musicala e davart la professiunalisaziun da persunas d’instrucziun da scola primara en il rom musica a la LMU da Minca. Il 1. da favrer 2025 ha Letizia A. Ineichen surpiglià la direcziun dal prorectorat furmaziun a la Scola auta da pedagogia dal Grischun.

Il cussegl da la scola autas, la direcziun da la scola auta sco era las collavuraturas ed ils collavuraturs gratuleschan a prof. dr. Reto Givel-Bernhard, a prof. dr. Silvia Deplazes ed a prof. dr. Letizia A. Ineichen per lur success.

Cussegl da la scola auta

Il cussegl da la scola auta è responsabel per la direcziun strategica ed il monitoring da la scola auta. En questa funcziun decida el davart las cundiziuns da basa per la furmaziun terziara da las scolastas e dals scolasts. Las cundiziuns da scolaziun specificas (localas e structuralas) sco era la savida actuala da la furmaziun da scolastas e scolasts vegnan resguardadas. Il cussegl da la scola auta è responsabel per tut las reglamentaziuns e tut ils process entaifer l’autonomia da las scolas autas.

ulteriuras infurmaziuns