Servetschs
Cussegl da las studentas e dals students
Il cussegl da las studentas e dals students da la Scola auta da pedagogia dal Grischun, il STURA, sa cumpona da studentas e students da differentas annadas da la SAPGR. Da mintga annada datti duas represchentantas u represchentants plus ina presidenta u in president dal segund onn da studi.
Tge faschain nus?
Nossa incumbensa principala è oravant tut quella dad esser in portavusch tranter las studentas ed ils students e las docentas ed ils docents respectivamain la direcziun da la scola auta. Nus prendain part a conferenzas impurtantas da las docentas e dals docents, manain discurs constructivs cun la direcziun da la scola auta e gidain las studentas ed ils students tar tut ils problems e tar tut las propostas. Saja quai in giavisch concernent l’organisaziun da l’instituziun, in problem u er in feedback positiv. Nus avain per tuts e tut in’ureglia averta e discutain en sesidas ils giavischs da vart da las studentas e dals students.
Cun il STURA avain nus sco studentas e sco students la pussaivladad da contribuir insatge a l’avegnir da la scola auta da pedagogia. Nus vegnin vesids ed era prendids serius.
Ulteriuras incumbensas dal STURA èn per exempel la planisaziun d’events per tut las studentas ed ils students. Ultra da quai gidain nus a coordinar l’apero d’advent che vegn organisà da la direcziun da la scola auta. Igl è impurtant ch’i dettia en l’entira scola auta da pedagogia in clima da lavur agreabel per las studentas e per ils students, ma era per la direcziun da la scola auta e per las docentas e per ils docents.
Organigram da la suprastanza dal Stura 2021/2022
