Sin il campus da la Scola auta da pedagogia dal Grischun datti puspè vita en ils auditoris ed en las stanzas da scola: L’onn da studi 2026/27 ha cumenzà. La scola auta beneventa 233 novas studentas e students – var 11 pertschient dapli che l’onn precedent. Tut en tut ha la scola auta actualmain 633 studentas e students e sa mova uschia vinavant sin in aut nivel sco en ils onns precedents.
Al cumenzament da l’onn da studi 2026/27 beneventa la SAP dal Grischun 233 novas studentas e students. Quai èn 11 pertschient dapli che l’onn precedent. Il cler augment che gia sa mussà tar las annunzias la primavaira, sa preschenta era tar las admissiuns. Spezialmain grond è l’interess per ils studis da bachelor: 176 persunas cumenzan in studi da bachelor u in studi supplementar a la SAP dal Grischun.
«Nus ans legrain fitg che tantas persunas èn sa decididas per la professiun da scolasta e scolast ed uschia per in studi a la SAP dal Grischun», di Reto Givel-Bernhard, rectur da la SAP dal Grischun. «Il grond dumber da novas studentas e students conferma l’attractivitad da nossa furmaziun pretensiusa e pratica. A medem temp è quai in signal impurtant per las scolas ch’han era vinavant basegn da persunas d’instrucziun bain scoladas.»
481 da tut las 633 studentas e students èn inscrits per in studi da bachelor. Uschia furman els il pli grond champ da furmaziun da la SAP dal Grischun. Spezialmain dumandà è il studi da bachelor Scola primara per la 1. fin 6. classa. 138 persunas cumenzan lur studi a temp cumplain u a temp parzial cumpareglià cun 122 l’onn precedent. Ulteriuras 32 persunas cumenzan il studi da bachelor Scolina e la scola primara per la 1. e 2. classa.
Las studentas ed ils students da bachelor absolvan lur scolaziun per tudestg, talian u biling en las cumbinaziuns tudestg e talian u tudestg e rumantsch.
En ils studis da master cumenzan 57 studentas e students da nov lur studi. Las purschidas sa drizzan tranter auter a persunas cun in bachelor spezialisà u in master spezialisà sco er a persunas d’instrucziun da la scola primara che vulan sa qualifitgar per il stgalim secundar I, per las scolas da maturitad u per la pedagogia curativa da scola. Dus da quests studis porscha la SAP dal Grischun ensemen cun la Scola auta interchantunala per pedagogia curativa Turitg respectivamain cun la Scola auta da pedagogia da Son Gagl.
Vivai l'entir mund da la SAP dal Grischun. Cun noss newsletter As infurmain nus regularmain davart temas actuals da la furmaziun, novitads, occurrenzas, fieras, curs, studis e bler dapli. As annunziai uss.
ulteriuras infurmaziunsIhr Browser (IE 11) ist leider zu alt und wird nicht mehr unterstützt.