Direcziun da l'organisaziun

Management da qualitad

Directivas dal management da qualitad da la SAP dal Grischun

La finamira surordinada dal management da qualitad è da garantir e sviluppar cuntinuadamain la qualitad en tut ils secturs e d’ademplir il mandat. La SAP dal Grischun ha elavurà otg directivas per concretisar las finamiras:

• Management da qualitad transparent: La SAP dal Grischun dispona d’in management da qualitad accessibel a la publicitad che vegn purtà da la direcziun, da collavuraturas e collavuraturs, da studentas e students sco era dad ulteriuras gruppas d’interess e che cumpiglia tut ils secturs da prestaziun. El è integrà en il svilup strategic da la scola auta e definescha las finamiras, las proceduras, ils resultats e las mesiras. Las responsabladads ed ils process èn cleramain reglads.
• Proceder basà sin las datas: La SAP dal Grischun rimna ed utilisescha sistematicamain datas qualitativas e quantitativas da programs, da la scolaziun, da studentas e students e da las resursas per pudair prender decisiuns fundadas.
• Meglieraziun cuntinuanta: La SAP dal Grischun sa stenta d’avair in’auta qualitad en tut ils secturs da prestaziun e sa sviluppa cuntinuadamain. En spezial examinescha ella regularmain ses studis, sias scolaziuns e ses projects da perscrutaziun e deducescha uschia mesiras per garantir e sviluppar la qualitad. Ella s’orientescha al ciclus da PDCA sco er a la «DNA» da la SAP dal Grischun. La SAP dal Grischun nizzegia medemamain la pussaivladad da proceduras externas per garantir la qualitad e sa sviluppa vinavant a basa dals resultats. Quai che pertutga las collavuraturas ed ils collavuraturs promova la SAP dal Grischun il svilup professiunal cuntinuant.
• Promoziun d’innovaziuns: La SAP dal Grischun promova innovaziuns ed è averta per novas ideas, metodas e tecnologias.
• Garanzia d’ina conscienza per qualitad: La SAP dal Grischun promova la conscienza per qualitad, en spezial cun ina communicaziun transparenta. En lur lavur quotidiana s’orienteschan las collavuraturas ed ils collavuraturs a las valurs ed als princips da manar da la SAP dal Grischun.
• Promoziun da la participaziun: La SAP dal Grischun integrescha tut las commembras e tut ils commembers da la scola auta en il svilup da qualitad. Ella promova in dialog constructiv ed in’atmosfera da lavur cooperativa.
• Sustegn per las studentas ed ils students: La SAP dal Grischun porscha resursas d’emprender, cussegliaziuns e purschidas da sustegn adequatas che correspundan als basegns multifars da las studentas e dals students.
• Communicaziun externa: La SAP dal Grischun publitgescha regularmain infurmaziuns actualas, objectivas e fidadas davart ses studis, sias scolaziuns e ses projects da perscrutaziun. Ella garantescha proceduras transparentas e gistas per l’admissiun, per la renconuschientscha da prestaziuns da studi gia cumprovadas e per las pretensiuns dals studis.

Il sistem da management da qualitad orientà al process da la SAP dal Grischun furma la basa per garantir la qualitad dals process interns e per optimar cuntinuadamain ils process.

La garanzia da la qualitad è part dal management da qualitad. Ella garantescha la qualitad en il senn da cuntanscher las finamiras tras mesiras d’examinaziun. I dat persunas incumbensadas per la qualitad che sustegnan la direcziun da la scola auta da garantir la qualitad.

Il circul da qualitad

Il circul da qualitad che cumpiglia l’entira scola auta sa cumpona da las persunas incumbensadas per la qualitad da las unitads d'organisaziun correspundentas e da la persunas responsablas per il svilup da la scola auta e per il management da qualitad (direcziun dal circul da qualitad) ha las suandantas finamiras resp. incumbensas:

• Barat regular davart la realisaziun dal reglament e da las directivas areguard il management da qualitad e reporting
• Svilup da la chapientscha da qualitad da la SAP dal Grischun
• Garanzia dal transfer dad enconuschientschas entaifer las unitads d'organisaziun
• Svilup dals instruments da qualitad e dals cuntegns
• Realisaziun dal ciclus PDCA