#Hochmusikalisch:

Fitg musicalas e musicals èn paucs, musicalas e musicals perencunter tuts

Auter ch'en autras scolas autas da pedagogia è musica in rom obligatoric a la SAP dal Grischun. Dentant è mintga studenta e mintga student talentà musicalmain? Ha mintga persuna in talent musical? Sa mintga persuna emprender da far musica cun in instrument? Tge signifitga musica sco rom da scola? E co san persunas d'instrucziun promover la musicalitad da lur scolaras e scolars en scola?

Franca Caspani, manadra dal studi Stgalim primar, en discurs cun la docenta da musica Cornelia Meier e cun ils scolasts instrumentals Christian Cantieni e Frieder Torp.

Tgi munta musica per vus?

Frieder Torp: La musica è mia zona da confort persunala ed il medem mument era mes ventil. La musica è mes dachasa.

Christian Cantieni: La musica è per mai sco in’accumpagnadra per vita duranta. Ella è ina part da mes equiliber intern.

Tge cuntegna il rom musica en scola?

Cornelia Meier: En il senn dal PI21 ed or da vista da la didactica da musica è musica quai: chantar chanzuns, splatschar ritmus, tschivlar ina melodia, sunar in instrument, sautar, tadlar musica, analisar musica, scriver musica, inventar musica e.u.v.

Avais vus ina regurdanza persunala da Vossa instrucziun da musica en scola primara?

Christian Cantieni: Jau pens ch'in project da musica u da teater saja marcant e laschia enavos fastizs impurtants da regurdientscha. Per mai eran spezialmain fascinants scolasts e scolastas che han sunà sezs in instrument en scola. Er il chantar cun pliras vuschs è stà impressiunant per mai ed è restà spezialmain en memoria.

Frieder Torp: En l'emprima classa hai jau gì in'atgna flauta ch’jau aveva construì cun mes bab. Pli tard hai sunà accordeon e tadlà musica da ländler. Quella sort musica m'ha commovì fermamain. Cun 14 onns m'ha mes bab mussà l'emprim accord sin la ghitarra. Da là davent savev’jau ch’jau stoppia emprender quest instrument.

È mintga persuna musicala?

Frieder Torp: Sch'ella ha ureglias avertas per la musica, investescha bler en quella ed exercitescha bler, gea.

Christian Cantieni: Musicala è mintga persuna che ha gugent musica ed è pronta da sa laschar en sin musica.

Cornelia Meier: Stefanie Stadler Elmer [1] ha mussà en sias retschertgas che tut ils uffants han access a la musica. Decisiv è ch’ils uffants vegnan gia fitg baud en contact cun la musica, il meglier gia durant la gravidanza. En il cas ideal succeda quai cun las pli stretgas persunas da referiment.

Deplorablamain n'han betg tut ils uffants la fortuna da pudair passentar ils onns da lur uffanza fin a l'entrada en scola en in ambient che promova la musica. Tals uffants vegnan lura savens etichettads sco "nunmusicals". Quels uffants n'èn dentant betg nunmusicals, mabain han in deficit d'experientscha constatabel. La scola ha in'obligaziun envers els che na parta betg da "nunmusical", mabain da deficits d'experientscha. Da princip han tut ils uffants plaschair da l'agir musical e pon s'exprimer musicalmain era senza enconuschientschas preliminaras.

Era scolas da musica porschan instrucziun da musica. Duai mintga uffant emprender in instrument?

Christian Cantieni: Mintga uffant duai vegnir intimà da far quai e vegnir sustegnì d’emprender in instrument. Per mintga uffant che vul quai duessi dar la pussaivladad.

Frieder Torp: Gea. L'aspect finanzial na duess betg esser in impediment. En auters pajais è l’impediment per quai bler pli bass. Ils uffants duessan dentant pudair decider sezs.

Co vesa or ina buna instrucziun da musica sin il stgalim primar?

Christian Cantieni: En il cas ideal instruescha la persuna d'instrucziun da classa er il rom musica. La musica na duess betg esser preschenta be durant las duas lecziuns per emna. Meglier èsi, sche la classa fa musica mintga di, per exempel cun ina chanzun cuminaivla al cumenzament dal di. La musica duai esser preschenta en l'instrucziun a moda multifara: chant, moviment e musica, ritmus, saut, experientschas musicalas cuminaivlas e.u.v.

Cornelia Meier: Tant Werner Jank sco era Mechtild Fuchs [2] inditgeschan in'instrucziun constructiva sco buna instrucziun da musica. L'instrucziun constructiva da musica lavura cun far musica da maniera multifara. En differents stils, furmas e modas da lavurar fan scolaras e scolars cuminaivlamain u sulets musica: quai vegn fatg per exempel cun chantar, gieus da moviment, orchester da classa, tamburs, saut, bodypercussiun, far musica cun instruments d'Orff, rock e folclora, boomwackers, mini-musicals e bler auter.

Il far musica da maniera multifara furma la basa per acquistar abilitads musicalas e las promova il medem temp. Quai duai far ora la gronda part dal temp d'instrucziun.

Il crear musical promova las abilitads musicalas. Per mai èsi decisiv che questas parts – che sa sviluppan sistematicamain en furma da curs -  na domineschian betg l'instrucziun, mabain l’accumpognan.

L'instrucziun da musica e musica en general serva medemamain a far accessibel culturas. En ina pratica musicala vivida pon ils uffants far experientschas musicalas ed esteticas ed uschia emprender ad enconuscher lur atgna cultura sco er autras culturas.

Frieder Torp: Musica duai svegliar emoziuns, pledentar ils sentiments ed esser in’ovra communabla. La musica collia ed ha l'effect inclusiv. Mintga uffant po contribuir musicalmain a l'ovra cumpletta. Dar la pauca il dretg mument è gist uschè impurtant sco l'emprima vusch.

Co vesa or ina buna instrucziun da musica per studentas e students a la SAP dal Grischun? Co po la scola auta metter la basa per ina buna instrucziun musicala en scola?

Cornelia Meier: Ina buna instrucziun da musica dovra persunas d'instrucziun che pon sa laschar en il mund da musica sco persuna da contact; ellas n'èn betg be persunas che chantan u sautan avant, dentant era persunas che chantan e sautan cun ils uffants. Per questa rolla duain las studentas ed ils students vegnir preparadas en il studi, sper tut il rest che tutga tar l'instrucziun da musica.

[1] Stadler Elmer, p. (2000). Spiel und Nachahmung. Aarau: Wege musikpädagogische Schriftenreihe, Band 12.

[2] Fuchs, M. (2015). Musikdidaktik Grundschule. Innsbruck: Helbling.
Jank, W. (2004). Thesen. Aufbauendes Musiklernen in der Schule. Vortrag auf dem 6. Mainzer musikpädagogischen Seminar.