Intervista

«La matematica daventa senza dubi adina pli impurtanta»

La digitalisaziun porta novas tecnologias e novas applicaziuns. Co vegnan quellas a midar nossa societad?

Igl è ina dependenza vicendaivla. La digitalisaziun ha per consequenza novas tecnologias ch’accelereschan puspè il process da la digitalisaziun. Quest process rasant ha ina gronda influenza sin nossa societad. Quai cumenza gia tar la moda e maniera co nus communitgain. In dals champs-clav ch’il process da digitalisaziun influenzescha è il sectur da furmaziun.

Co sa mussa l'influenza da la digitalisaziun sin noss sistem da furmaziun?

La digitalisaziun porscha la schanza da render pli accessibels e pli persunalisads cuntegns da furmaziun en l'instrucziun. Plattafurmas sco Moodle, cun las qualas nus lavurain er a la SAP dal Grischun ed ulteriuras medias digitalas daventan adina pli derasadas. Quai pussibilitescha d'emprender independentamain dal lieu e dal temp. Quest svilup intimescha da cuntinuar cun las metodas d'instrucziun en vista a l'emprender individualisà.

Co pon las scolas garantir ch'ellas preparian ils uffants ed ils giuvenils a moda optimala per las pretensiuns da l'avegnir?

In'instrucziun persistenta na sa concentrescha betg mo sin enconuschientschas dals fatgs, mabain era sin la chapientscha da concepts e sin il svilup da cumpetenzas da schliar problems. In punct da partenza orientà a las cumpetenzas che promova in pensar critic e soluziuns creativas dal problems ha in grond effect or da la perspectiva da la perscrutaziun. Il Plan d'instrucziun 21 porscha qua bunas metodas. Plinavant è la collavuraziun cun scolas autas ed universitads impurtanta per integrar enconuschientschas actualas da la scienza spezialisada e da la didactica dal rom en l'instrucziun e per dar invistas impurtantas a las scolaras ed als scolars. Exempels èn il center da MINT a la SAP dal Grischun ed il Center da perscrutaziun per scolaras e scolars (SFZ) a Jena che jau hai accumpagnà scientificamain plirs onns.

Tge As fascinescha vi da la matematica?

En connex cun questa dumonda ma vegnan endament differents aspects fascinants da la matematica. Uschia impressiunescha la matematica per exempel cun ina profunda bellezza estetica ch'è da chattar en musters e structuras matematicas sco la simmetria da differentas geometrias u la logica d'in mussament elegant.

Gudogna ella dapli impurtanza cun utilisar dapli applicaziuns tecnologicas?

Gea, senza dubi. La matematica è la basa per bleras tecnologias (digitalas). Uschia dependa la segirezza da la communicaziun e da las transacziuns digitalas fitg ferm da proceduras da codar criptograficas che sa basan sin algoritmus matematics. Era l'intelligenza artifiziala resp. l'emprender mecanic èn champs che dependan fermamain da concepts matematics sco l'algebra, l'optimaziun e la statistica. Il svilup dals algoritmus che pon emprender e percorscher ils musters en datas sa basa sin in fundament matematic.

Duvrain nus pia dapli instrucziun da matematica en scola?

Gea, ma betg simplamain dapli uras. Impurtant è ch'ils cuntegns da matematica vegnian instruids a moda interdisciplinara e colliada. La matematica è preschenta dapertut. Igl è impurtant che – en il senn d’ina instrucziun da MINT integrativa - concepts da matematica fundamentals sco simmetrias e connexs funcziunals en l'instrucziun vegnian percepids da las scolaras e dals scolars, uschia ch'il svilup da las cumpetenzas vegnia mess sin ina vasta basa.

Tge enconuschientschas pon ins deducir dals resultats dal studi da PISA per l'instrucziun en scola?

Il studi actual da l’OECD porscha ina survista dals stadis da cumpetenza da scolaras e scolars en tut il mund, surtut per las cumpetenzas en matematica e scienzas natiralas. Scolaras e scolars svizzers rangheschan qua constantamain sin in aut nivel. Tuttina dovri ulteriurs sforzs per ch'i restia uschia. Dus aspects centrals che pon gidar a far quai èn il diever pli intensiv da las medias digitalas tar l’instruir e tar l’emprender sco era la promoziun da la cumpetenza per schliar problems da las scolaras e dals scolars.

Tge enconuschientschas davart l'efficacitad da l'instrucziun da MINT sa mussan da la perscrutaziun?

Ina metoda integrativa e collianta promova spezialmain in'instrucziun persistenta da MINT. Plinavant mussan resultats da perscrutaziun actuals l'impurtanza da l'orientaziun a la pratica sco er dal connex da l’applicaziun per l'instrucziun da MINT. Las scolaras ed ils scolars mussan in interess pli grond e meglras prestaziuns, sch'ellas ed els vesan co ch'ils roms pon gidar a schliar problems reals. Ultra da quai porschan las medias digitalas novas pussaivladads, sco simulaziuns u labors online, quai che fa daventar l’emprender pli concret ed interactiv.

Tge puncts da partenza han auters pajais, en spezial la Germania?

Il rapport actual «Digital Education Outlook 2023» da l’OECD mussa co che scolas sin l'entir mund pon nizzegiar tecnologias digitalas per meglierar lur sistems da furmaziun. Duas dumondas centralas occupan actualmain tut ils pajais: Co pon vegnir promovidas las cumpetenzas digitalas da las persunas d'instrucziun e tge directivas e mesiras da protecziun dovri per pussibilitar in diever efficazi e gist da l’intelligenza artifiziala en la furmaziun?

Tge sa la Svizra emprender da l’exteriur?

Sco en Svizra, è er en Germania la digitalisaziun dal sistem da furmaziun ina gronda sfida. L’actual program da promoziun tudestg «Basis-DigitalPakt Schule 2019 bis 2024» cumpiglia 5 milliardas euro. Però n'èsi betg fatg cun in bun equipament. Decisiv sto esser il primat da la pedagogia. La tscherna d'in med digital sto succeder tenor las finamiras pedagogicas.

Dovri novas strategias per pudair garantir che nus hajan en l'avegnir avunda spezialistas e spezialists da MINT?

Igl è impurtant da promover ad uras. Gia en la vegliadetgna da la scola primara vegn il terren preparà per in ferm interess e per cumpetenzas solidas en roms da MINT. Purschidas da furmaziun che sveglian il plaschair da scuvrir e d’experimentar èn decisivas per la carriera da MINT. Medemamain savain nus da la perscrutaziun che las persunas d'instrucziun èn in factur-clav. Lur qualificaziun e lur engaschament èn decisivs per la qualitad da l'instrucziun da MINT. Furmaziuns supplementaras e sustegn professiunal pon sustegnair las persunas d'instrucziun da concepir lur instrucziun a moda pli efficazia e d'intermediar cuntegns actuals. La SAP dal Grischun porscha perquai in program da perfecziunament cumplessiv per persunas d’instrucziun.