Communicaziun a las medias

Classas da Valragn e Schons avran lur museums  

Suenter dis da project intensivs èn duas stallas betg pli duvradas vegnidas transfurmadas ad Andeer ed a Spleia en museums archeologics dal temp preschent. Ils uffants da la scola da la Val Schons e da Valragn cun lur persunas d'instrucziun ed il team da project dad AMuG da la Scola auta da pedagogia dal Grischun (SAPGR) spetgan a l'avertura ils giasts dal vitg, da la regiun ed auters. Las classas han la responsabladad per l'occurrenza. Suenter che las exposiziuns èn vegnidas planisadas d'in team da curaturs e curaturas, signalisadas dal team da grafica e documentadas en maletg e text dal team da documentaziun, surpiglia il team d'avertura il bainvegni dals giasts. Il team d'intermediaziun maina las visitadras ed ils visitaders cun savida fundada tar exponats elegids tras l'exposiziun. 

Dus museums cun mintgamai duas exposiziuns 

Sin in viadi tras differents temps preschentan las scolaras ed ils scolars en l'exposiziun istorica exponats da lur conturn local ch'els han intercurì cun metodas istoricas. Il spectrum tanscha da la furtgetta da fieu cun dus pizs a la maniglia dal vegl mulin fin ad in vegl rom dad ina fanestra. En tschella exposiziun insceneschan las scolaras ed ils scolars restanzas da lur agen conturn ch'els han transfurmà cun metodas da l'art contemporan ad ovras da valur per lur exposiziun. Per exempel ina tastatura dal computer, in elan da plisch ed ina tastga da viadi. Ultra dals exponats originals survegnan las visitadras ed ils visitaders infurmaziuns da basa davart ils tocs da l'exposiziun - davart il context persunal ed istoric e dvart la muntada per la regiun.

Suenter l'avertura festiva dal museum mainan las classas vinavant il museum fin las vacanzas d'atun. Latiers tutga era la seria d'occurrenzas publicas «AMuG il venderdi» ad Andeer resp. «AMuG il mardi» a Spleia. Ina gruppa da scolaras e scolars è pronta da preschentar ils exponats preparads ad in public interessà - ina giada or d'ina perspectiva istorica, in'autra giada or da la perspectiva d'art. 

In project da svilup interdisciplinar 

La SAP dal Grischun iniziescha e responsescha il project interdisciplinar cun la finamira d'experimentar settings d'emprender orientads al project e cumbinar ina furmaziun per in svilup persistent, l'emprender istoric ed ils process artistics. Il prorectorat Perscrutaziun e svilup da la SAP dal Grischun accumpogna scientificamain il project e perscrutescha co che tals access interdisciplinars influenzeschan il pensar e l'agir dals uffants - spezialmain en vista a pliras perspectivas, in pensar critic ed il svilup da strategias da soluziun creativas. 

Responsabels per il project general èn ils dus docents da la SAP dal Grischun Sabine Bietenhader, istoricra e didacticra da NUS sco era Lukas Bardill, artist e pedagog d'art. L'instrucziun vegn realisada da Michelle Abeni e Yara Peretti ensemen cun las persunas d'instrucziun da la 5avla e 6avla classa, Fabio Cantoni, Joëlle Schoenahl, Giuliana Bardill e Cristiana Flütsch. 

Partenaris e promoturs

Sin basa da sias finamiras persistentas vegn il project sustegnì - sper numerusas autras instituziuns - er dal Parc natiral Beverin. Il Parc natiral s'engascha per la furmaziun per in svilup persistent, per il rinforz da la diversitad culturala e da l'identitad regiunala sco era per il barat tranter las generaziuns e las culturas - adina cun il focus sin l'atgna regiun. Ils dus museums AMuG ad Andeer e Spleia sustegnan questa finamira cun promover il barat prezius tranter las generaziuns e cun dar vinavant e render visibel savida e novas ideas. 

Suenter ils projects AMuG a Valendau (2023) e Flerden (2025) cuntanscha il project cun la realisaziun parallela ad Andeer ed a Spleia ses punct culminant - ed il medem mument ina finiziun provisorica. Sche ed en tge furma che la promoziun da scola da giuvnas acturas culturalas e giuvens acturs culturals vegn cuntinuada en in project successiv sur ils cunfins dal Parc natiral Beverin, è actualmain anc avert. 

La realisaziun da la AMuG sut l'instituziun principala da la SAP dal Grischun dastga quintar cun in sustegn finanzial, material e professiunal da las suandantas instituziuns e persunas:

• Fundaziun per art, cultura ed istorgia, Winterthur
• Fundaziun Beisheim, Baar
• Parc natiral Beverin
• Societad d'utilitad publica dal chantun Grischun, Cuira
• Servetsch archeologic dal Grischun, Cuira
• éducation21, Berna
• Museum retic, Cuira
• Promoziun da la cultura dal Grischun, Uffizi da cultura, Swisslos, Cuira
• Uniun da las Gualsras e dals Gualsers dal Grischun, Tavau
• Scola auta spezialisada dal Grischun, Cuira
• Vischnanca politica Andeer
• Vischnanca politica Valragn
• Walserama, Nufenen
• Reto Attenhofer
• Museum Rheinwald, Spleia
• Studio Capisci, Cuira
• Andrea und Christian Michelsen
• Prof. dr. Hanspeter Wehrli
• Dr. Bernhard Matter
• Varinia Hassler