Dapi daditg stattan en l‘entir mund la diversitad linguistica e culturala, la promoziun ed il mantegniment da linguas minoritaras e linguas periclitadas en il center da l’interess da la perscrutaziun, da la pratica e dal svilup. Medemamain en il focus èn la renconuschientscha da las linguas da segns en la societad ed en il context da furmaziun, la chapientscha tranter las cuminanzas linguisticas ed en quest connex era la rolla da la digitalisaziun. Ultra da quai vegn la tematica da las minoritads linguisticas indigenas e dependentas da la migraziun discutada a moda vasta en differents contexts.
La dieta a Tavau è la 10avla dieta scientifica sut il patrunadi dal consorzi internaziunal «Plurilinguitad sco schanza». Suenter ch’ella è vegnida realisada en Belgia, a Luxemburg, Germania ed Austria ha ella lieu per l’emprima giada en Svizra.
Plattafurma per dumondas multifaras
«Sin basa da sia plurilinguitad sa porscha il chantun Grischun spezialmain sco lieu da realisaziun», è prof. dr. Vincenzo Todisco, manader da la professura per talian e didactica da talian a la Scola auta da pedagogia dal Grischun, persvas. El organisescha la dieta ensemen cun prof. dr. Edina Krompák, manadra da l’Institut per didactica dal rom da las linguas e da la linguistica da furmaziun da la Scola auta da pedagogia da Lucerna. Todisco è surstà positivamain dal grond eco: «Gia dapli che tschient represchentantas e represchentants da linguas minoritaras da tut ils continents èn s’annunziads. Nus spetgain fin duatschient participantas e participants.» Krompák punctuescha l’urgenza da resguardar las linguas minoritaras en il context da furmaziun che sa mussa en il grond eco internaziunal da la conferenza. Il program porscha ina plattafurma per la perscrutaziun e per la chapientscha da las dimensiuns da la plurilinguitad, da las linguas minoritaras, da la promoziun da lingua, dal mantegniment da la lingua e da las linguas da segns en in context global. Ultra da quai vegnan dilucidadas las consequenzas da la transfurmaziun digitala, en spezial da l’intelligenza artifiziala per la promoziun da la plurilinguitad. Medemamain vegnan tematisadas las linguas periclitadas indigenas e lur revitalisaziun.
Anc plazs libers
La dieta sa drizza ad expertas ed experts da la perscrutaziun, da la furmaziun e da la politica, dentant er a persunas d’instrucziun, studentas e students sco er ad ulteriuras persunas interessadas che s’occupan da dumondas (socio)linguisticas, da la politica da furmaziun e da la didactica en connex cun la plurilinguitad e cun las minoritads en il senn il pli vast.
Dapli infurmaziuns ed annunzia: phgr.ch/minoritads-linguisticas
