Co pon ins francar en moda structurada la diversitad e l'egualitad en interpresas? Tge rolla giogan las persunas da cader en quest connex? A questa ed ad ulteriuras dumondas sa deditgescha l'occurrenza «Diversity in Leadership & Tech: francar la diversitad» dals 12 da favrer 2024 en l'Auditori da la Banca Chantunala Grischuna (BCG) a Cuira. L'occurrenza vegn organisada da Diversity-gr, ina iniziativa da represchentantas e represchentants da l'economia, da la furmaziun, da la perscrutaziun e dal maun public, tranter quels er il Post da stab per l'egualitad da las schanzas per dunnas ed umens.
En ses referat d'impuls «Gleichstellung auf dem Prüfstand» dat Ines Hartmann al cumenzament ina invista dal stadi da la perscrutaziun. La co-directura dal Competence Centre for Diversity & Inclusion al Post da perscrutaziun per management internaziunal da l'Universitad da Son Gagl mussa, nua che l'economia svizra ed en spezial la branscha da tecnologia sa chatta areguard la represchentanza da dunnas en general e particularmain en posiziuns da cader. Ella mussa obstachels e pussaivladads, co che la diversitad e l'egualitad pon vegnir francadas structuralmain e culturalmain. «L'egualitad da las schanzas è ina incumbensa interdisciplinara che pretenda l'integraziun da finamiras d'egualitad en la strategia, en las structuras ed en ils process da planisaziun currents», postulescha l'experta per diversitad ed inclusiun. Centrala saja l'integraziun da las persunas da cader sco quellas persunas che han la responsabladad principala.
Pussibilitar in agir
Il «martgà da las bunas ideas» dat l'occasiun d'approfundar e da preschentar il tema central «francaziun». Sin stans davart furmas d'organisaziun, labels, mesirabladad e finamiras, raits sco er cultura d'organisaziun preschentan e discutan interpresas e persunas spezialisadas buns exempels sco er pussaivladads d'agir.
Ina discussiun al podium cumplettescha l'occurrenza. Las persunas da cader tiran in facit per sasezzas e per lur interpresa e discutan las consequenzas necessarias. L'apero riche a la fin da l'occurrenza envida da sa barattar e da crear raits.
Ina rait che vegn sustegnida vastamain
Diversity-gr porscha ina plattafurma ad interpresas da la branscha da tecnologia ed a champs professiunals ch'èn pertutgads da la transfurmaziun digitala. La rait pussibilitescha da barattar experientschas, sensibilisescha per contexts e dat impuls per process da midament. Ella vegn purtada dal Post da stab per l'egualitad da las schanzas per dunnas ed umens, dal Center d'innovaziun CSEM, da l'Academia Raetica, da «Women in Tech Switzerland», dal Center da las IPM Grischun, da la Scola auta spezialisada dal Grischun e da la Scola auta da pedagogia dal Grischun.
