Cussegl da la scola auta

Il cussegl da la scola auta è responsabel per la direcziun strategica ed il monitoring da la scola auta. En questa funcziun decida el davart las cundiziuns da basa per la furmaziun terziara da las scolastas e dals scolasts. Las cundiziuns da scolaziun specificas (localas e structuralas) sco era la savida actuala da la furmaziun da scolastas e scolasts vegnan resguardadas. Il cussegl da la scola auta è responsabel per tut las reglamentaziuns e tut ils process entaifer l’autonomia da las scolas autas.

Noss cussegl da la scola auta

Il cussegl da la scola auta sa cumpona suandantamain:

Dr. Hans Peter Märchy

President

Suenter sia scolaziun a l’Universitad da Turitg è dr. Hans Peter Märchy stà occupà insaquants onns en l’informatica tar la Banca naziunala svizra ed è vegnì elegì il 1989 sco persuna d’instrucziun per matematica ed informatica a la Scola chantunala grischuna (SCG). Dal 1994 fin la fin dal 2005 ha el manà la SCG sco rectur. Durant ses temp da rectorat è tranter auter vegnida introducida la maturitad professiunala, il gimnasi è vegnì refurmà e las scolas autas da la Svizra èn vegnidas adattadas al sistem da Bologna. El ha manà il project per l’introducziun dal reglament davart la renconuschientscha da la maturitad (RRM) e spezialmain l’integraziun dal seminari inferiur en la scolaziun gimnasiala. Parallelamain a quest process è succedì il transferiment dal seminari superiur en la Scola auta da pedagogia. Dal 2006 al 2020 ha el manà l’Uffizi per la furmaziun media-superiura (UFMS). En quest temp ha l’UFMS manà l’introducziun da la lescha davart las scolas autas e la perscrutaziun e l’elavuraziun da la strategia chantunala per las scolas autas e per la perscrutaziun. Dr. Hans Peter Märchy è stà durant plirs onns commember da differents cussegls da scola. Dapi la stad 2022 è el president dal cussegl da la scola auta da la SAP dal Grischun.

Sandra Locher Benguerel

Vicepresidenta

Sandra Locher Benguerel è activa en differentas funcziuns: sco scolasta primara, cussegliera naziunala dal Grischun, commembra da la cumissiun per scienza, educaziun e cultura dal Cussegl naziunal ed era sco commembra da la direcziun da l’associaziun Magistraglia svizra (MCH). Ella è colliada dapi blers onns en differentas funcziuns cun la SAP dal Grischun. Sco scolasta ha ella profità regularmain dal program varià da la furmaziun cuntinuada per sviluppar vinavant sias cumpetenzas d’instruir. Plinavant ha ella accumpagnà studentas e students sco persuna d’instrucziun da la pratica. En questa funcziun ha ella collavurà a l’elavuraziun da las unitads d’atelier che mainan studentas e students per l’emprima giada en la pratica. Dapi il 2014 collavura ella sco commembra dal cussegl da la scola auta a la direcziun strategica da la SAP dal Grischun. Tar quella lavur è ella adina puspè fascinada da la varietad linguistica e da las dumondas pedagogicas e socialas actualas che caracteriseschan la furmaziun da scolastas e scolasts e che dattan a la SAP dal Grischun ses aspect unic.

Prof. Dr. Walter Bircher

Commember

Suenter sia scolaziun al seminari da scolasts da l’Argovia ha Walter Bircher lavurà dus onns sco magister primar. A l’Universitad ed a la SPF a Turitg ha el suenter absolvì in studi da scienzas natiralas ch’el ha terminà cun il doctorat fil II. El è stà activ en differentas funcziuns: sco docent per “didactica uman ed ambient” e pli tard sco vicedirectur dal seminari da scolasts primars dal chantun Turitg, sco directur dal seminari da scolasts reals e dal stgalim secundar dal chantun Turitg e sco prorectur da la furmaziun e fin la fin dal 2015 sco rectur da la SAP dal chantun Turitg. La SAP da Turitg ha gia dapi adina in bun contact cun la SAP dal Grischun. Ensemen han ellas realisà l’emprim studi “Stgalim secundar I per persunas d’instrucziun” dal chantun Grischun.

Cumplementar a la professiun ha el absolvì in perfecziunament da management a l’Universitad da Turitg. Walter Bircher è stà commember da la suprastanza da la Conferenza svizra da las recturas e dals recturs da las Scolas autas da pedagogia (COHEP) sco era activ en la chombra SAP da “swissuniversities”. Dapi il 2022 è Walter Bircher commember dal cussegl da la scola auta.

Piera Furger

Commembra

Piera Furger è stada 40 onns persuna d’instrucziun dal stgalim secundar è davent dal 2001 scolasta e manadra da scola a la scola secundara e reala da Mesocco. Davent dal 2012 fin a sia pensiun l’onn 2022 è ella stada responsabla per Mesocco en la direcziun regiunala da la scola secundara e reala Moesano. Durant sia activitad professiunala è ella stada colliada stretgamain cun la SAP dal Grischun. Sco scolasta ha ella pudì profitar da perfecziunaments che l’han persvadida da persequitar vinavant permanentamain l’innovaziun e l’ulteriur svilup da concepts pedagogics. La SAP è adina era stà in lieu impurtant per inscunters, per discutar cun inspecturas ed inspecturs da scola e cun collegas dal Grischun da lingua taliana.

Dapi il 2018 è ella commembra dal cussegl da la scola auta ed appreziescha da collavurar al svilup strategic da l’instituziun. “Mintga giada che jau entrel en la scola, sent jau in’atmosfera positiva e las valurs da la trilinguitad”, di Piera Furger. Ella citescha gugent in patratg da Jean Piaget che va bain a prà cun il spiert strategic che regia a la SAP dal Grischun: “La finamira principala da la furmaziun en scola duess esser da furmar umens e dunnas ch’èn capabels da far chaussas novas, e betg simplamain da repeter quai ch’autras generaziuns han fatg”.

Cornelia Mathis-Schibig

Commembra

Cornelia Mathis-Schibig lavura dapi 1996 – cun interrupziuns per motivs famigliars – sco persuna d’instrucziun da scolina, actualmain en temp parzial a Domat. Quella giada ed er ussa è quai adina stà sia professiun da siemi. Quai che la plascha il meglier vi da la lavur è la varietad. Ella ha pudì accumpagnar tschients dad uffants tras la scolina. Uffants èn vegnids e puspè ids, disas da giugar e far termagls ed ils interess dals uffants èn sa midads. Tge ch’è restà è stada sia passiun da dar insatge sin via als uffants e la collavuraziun empernaivla cun ils geniturs. Ella è sezza mamma d’in mat passiunà per il ballape e d’ina feglia adolescenta. Ultra dal consort e dals uffants vivan anc dus giats e peschs en sia chasada. Las fins d’emna passenta ella savens cun activitads communablas en ses dachasa a Favugn u en il chantun Tessin. Sin basa da sia scolaziun al seminari da mussadras a l’anteriura Scola da dunnas e da differents perfecziunaments a la SAP dal Grischun, han ins dumandà ella avant quatter onns da far part al cussegl da la scola auta. Per ella saja quai ina onur dad esser activa per l’instituziun, di Cornelia Mathis-Schibig.

Lea Simeon

Commembra

Lea Simeon lavura sco psicoterapeuta per uffants e giuvenils en il Center da psichiatria a Glion (Servetschs psichiatrics dal Grischun). Cumplementar a la professiun absolva ella il studi da perfecziunament postgradual en psicoterapia sistemica a l’Institut per il svilup e la perscrutaziun sistemica a Turitg. En la lavur terapeutica tschertga ella, ensemen cun ils uffants, ils giuvenils e lur famiglias vias da soluziun e rinforza lur cumpetenzas d’agir. En il center stat l’agid per gidar sasez. La visiun “lernen, instruir, sviluppare” da la SAP dal Grischun ed il focus da la trilinguitad enconuscha ella er en sia lavur terapeutica. Clientas e clients emprendan d’enconuscher novas pussaivladads da cumportament, co ch’ellas ed els pon reagir a sfidas e vegnan sustegnids en lur svilup.
Tant sco docenta per psicologia pedagogica (accent educaziun e svilup, Institut sec I & II) a la SAP FHNW, sco cussegliadra diplomada per professiun, studi e carriera u sco persuna d’instrucziun gimnasiala per psicologia e pedagogia a la Scola chantunala a Cuira è ella adina stada interessada al discurs en connex cun dumondas da l’instrucziun, da la perscrutaziun e da la furmaziun.

Aita Zanetti

Commembra

Sco mamma da quatter uffants, pura ed abitanta d’ina vischnanca rumantscha en l’Engiadina bassa s’engascha Aita Zanetti per las schanzas da furmaziun dad uffants e giuvenils en sia val. “Las scolaras ed ils scolars duain avair pussaivladads da scolaziun cumparegliablas a quellas dad uffants da las citads. Quai premetta persunas d’instrucziun motivadas ed innovativas cun ina buna scolaziun. Ellas èn ina pitga impurtanta per l’ulteriur svilup dals uffants, ma ellas èn oravant tut ina part dal fundament da furmaziun da la regiun. Senza in bun fundament na san ins construir nagins bajetgs, e senza structuras da scolaziun correspundentas na san ins betg rinforzar quest fundament”, di la deputada ed anteriura presidenta dal Cussegl grond e presidenta communala da Scuol. Dapi la stad 2022 è Aita Zanetti commembra dal cussegl da la scola auta da la SAP dal Grischun e cun quai cunresponsabla per la direcziun strategica da l’instituziun. En il cussegl da la Scola auta da pedagogia sa vesa ella sezza sco ina dunna che ha ina perspectiva d’ordaifer, senza avair gì enfin ussa puncts da contact directs cun l’instituziun.

Las commembras ed ils commembers dal cussegl da la scola auta inclus il presidi vegnan tschernids da la regenza.