La publicaziun festiva per il giubileum da 20 onns da la Scola auta da pedagogia dal Grischun è in ulteriur punct culminant durant l'onn da giubileum. L'ovra da 144 paginas na tracta betg be l'istorgia da la scola auta. El serra cun in sguard vers il futur e cun in quint da model che skizzescha ina varianta da la furmaziun da scolastas e scolasts enturn il 2035.
La publicaziun festiva per il giubileum da 20 onns da la Scola auta da pedagogia dal Grischun porta il titel "Ina furmaziun d'auta qualitad per tuts". Il motto fa attent sin la gronda impurtanza sociala attribuida a la furmaziun da las persunas d'instrucziun. Quai vegn accentuà en la publicaziun festiva en moda impressiunanta cun numerusas testimonianzas da persunalitads da la scienza, da l'economia e da la politica.
La publicaziun festiva preschenta en quatter parts l'istorgia dal svilup da la Scola auta da pedagogia dal Grischun en il context da la terziarisaziun da la furmaziun da las persunas d'instrucziun da l'onn 1995 fin oz en l’entira Svizra. Per finir ristgan il president dal cussegl da la scola auta, Hans Peter Märchy, ed il rectur da la scola auta da pedagogia dal Grischun, Gian-Paolo Curcio, da dar in sguard en l'avegnir da la furmaziun da scolastas e scolasts.
La part I descriva il transferiment da las differentas instituziuns da furmaziun da scolastas e scolasts sco era dal seminari scolastic dal Grischun a la Scol'auta professiunala da pedagogia dal Grischun. En l'emprima part vegnan focussads ils svilups svizzers, en la segunda part quels dal Grischun.
La part II descriva la via da la Scola auta professiunala da pedagogia dal Grischun a la Scola auta da pedagogia sco institut autonom da dretg public sin basa da temas centrals, sco per exempel la terziarisaziun interna ed externa ed il svilup da las scolas autas correspundent.
La part III mussa ils svilups da la Scola auta da pedagogia dal Grischun, posiziunada, accreditada e renconuschida durant ils onns 2017 fin 2023.
La part IV s'occupa da dumondas e sfidas actualas da la furmaziun da las persunas d'instrucziun en il Grischun e finescha cun in quint da model che skizzescha in model da scolaziun pussaivel enturn l'onn 2035.
Indicaziuns bibliograficas:
La publicaziun festiva stat a disposiziun gratuitamain a tut las persunas interessadas sco publicaziun open-access.
In'ediziun stampada d'auta qualitad po vegnir retratga directamain tar hep verlag bezogen werden.
Robert Ambühl è stà president dal cussegl da la SAP dal Grischun dals onns 2011 fin 2022. Durant ses temp d'uffizi è la SAP dal Grischun vegnida accreditada per l'emprima giada instituziunalmain.
Ines Camenisch è docenta per scienzas d'educaziun e lavura dapi l'onn 2002 a la SAP dal Grischun.
Prof. dr. Rico Cathomas è professer per didactica dal rom rumantsch e plurilinguitad. El lavura dapi il 2012 a la SAP dal Grischun.
Prof. dr. Lucien Criblez, professer per la perscrutaziun istorica da furmaziun e per l'analisa da la politica da furmaziun a l'universitad da Turitg, preschenta en il text introductiv da la publicaziun festiva la terziarisaziun da la furmaziun scolastas e scolasts en Svizra.
Prof. Dr. Gian-Paolo Curcio è dapi l'onn 2014 rectur da la SAP dal Grischun. Sco editur e cunautur da la publicaziun festiva illuminescha el a moda pli approfundada temas selecziunads e segna la perspectiva futra da la SAP dal Grischun.
Dr. Silvia Deplazes è dapi l'onn 2019 prorectura da la furmaziun cuntinuada a la SAP dal Grischun.
Dr. Leci Flepp è vegnì elegì l'onn 2007 a la SAP dal Grischun sco manader da la partiziun "perscrutaziun, svilup e servetschs". El ha manà la partiziun fin a sia pensiun la stad 2022.
Dr. Johannes Flury è stà rectur da la SAP dal Grischun dal 2006 fin il 2014. El ha manà la scola auta professiunala da pedagogia dal Grischun en sia independenza, ha cuntanschì la renconuschientscha da la CDEP dals studis ed ha stabilì numerusas cooperaziuns naziunalas.
Dr. Reto Givel lavura dapi l'onn 2019 sco prorectur furmaziun a la SAP dal Grischun. Sut sia direcziun èn vegnids introducids ils novs studis da bachelor e da master da la SAP dal Grischun.
Il 2006 è la Scola auta professiunala da pedagogia dal Grischun daventada in institut autonom da dretg public ed uschia la Scola auta da pedagogia dal Grischun. Suenter è Martin Jäger vegnì elegì da la regenza dal chantun Grischun sco emprim president dal cussegl da la scola auta.
Il rectur da fundaziun dr. Andrea Jecklin è vegnì nominà da la regenza dal chantun Grischun per il 1. da schaner 2003 sco emprim rectur da la Scola auta professiunala da pedagogia dal Grischun. En sia contribuziun descriva el la fasa da preparaziun e da partenza da la Scola auta professiunala da pedagogia dal Grischun.
Dr. Ursina Kerle lavura dapi l'onn 2002 en differentas funcziuns a la SAP dal Grischun. Oz è ella collavuratura scientifica en il stab da prorectorat "perscrutaziun e svilup". Ella maina il project parzial "Publicaziun festiva per il giubileum da 20 onns da la Scola auta da pedagogia dal Grischun".
Lilian Ladner lavura dapi l'onn 2010 a la SAP dal Grischun. Actualmain maina ella il post spezialisà MINT e divers projects da scolas autas. Ensemen cun Fabienne Welte è ella stada responsabla per il project general "20 onns scola auta da pedagogia dal Grischun" ed è stada responsabla il project parzial "Agid per ils pensums".
Dr. Hans Peter Märchy è vegnì elegì l'onn 2022 sco successur da Robert Ambühl sco president dal cussegl da la SAP dal Grischun.
Dr. Chantal Marti-Müller è stada engaschada dapi il 2004 tar la SAP dal Grischun, ha manà dals onns 2007 fin 2020 la partiziun "furmaziun pratica professiunala" ed era commembra da la direcziun da la scola auta. In merit da sia lavur è stà la realisaziun dal semester pratic professiunal ch'è vegnì purschì per l'emprima giada en tut la Svizra a la SAP dal Grischun.
Luzius Meyer ha manà la partiziun "furmaziun cuntinuada" da la SAP dal Grischun dals onns 2005 fin 2019. El è tranter auter stà responsabel per las purschidas da la furmaziun cuntinuada areguard l'introducziun dal Plan d'instrucziun 21.
Dr. Jon Domenic Parolini è vegnì elegì il matg 2014 sco cusseglier guvernativ dal chantun Grischun. Dapi il 2019 è el schef dal Departament d'educaziun, cultura e protecziun da l'ambient e responsabel per ils fatgs da furmaziun dal Grischun. El è l'autur da la prefaziun da la publicaziun festiva dal giubileum da 20 onns da la Scola auta da pedagogia.
Rico Puchegger lavura dapi l'onn 2008 tar la SAP dal Grischun. El è docent per eLearning e per il modul medias ed informatica e collavura a divers projects en il champ da MINT.
Dinesh Rajakaruna lavura dapi l'onn 2014 tar la SAP dal Grischun ed è dapi il settember 2016 directur administrativ. En sia funcziun promova el tranter auter il process da digitalisaziun dal manaschi da scola auta.
Prof. dr. Francesca Suter lavura dapi la primavaira 2022 sco professura per scienzas d'educaziun a la SAP dal Grischun. Ses accent da lavur è l'emprender autoregulà.
Prof. dr. Vincenzo Todisco è professer per didactica da plurilinguitad integrada talian. El lavura dapi il 2003 a la SAP dal Grischun.
Fabienne Welte ha lavurà fin sia sortida la primavaira 2023 sco collavuratura scientifica en il stab da rectorat ed era responsabla per ils projects academics. Ella è stada responsabla ensemen cun Lilian Ladner per il project general "20 onns scola auta da pedagogia dal Grischun".
Thomas Willi è vegnì elegì l'onn 2015 sco manader dal ressort furmaziun supplementara a la SAP dal Grischun. Oz lavura el sco manader e cussegliader da studi dal stgalim secundar.
La SAP dal Grischun festivescha l’onn 2023 ses giubileum da 20 onns. Dapi il temp da fundaziun ha nossa scola auta promovì ed influenzà en moda singulara l’instrucziun e l’emprender en il Grischun cun sias purschidas da furmaziun e cun sias activitads da perscrutaziun. Nus ans legrain da passentar e da festivar cun Vus quest onn spezial cun differentas activitads e rapports.
ulteriuras infurmaziuns
Persunalitads da la scienza, da l'economia e da la politica da furmaziun preschentan differents aspects da la furmaziun da scolastas e scolasts e mussan co che la SAP dal Grischun vegn percepida en la publicitad.
ulteriuras infurmaziunsIhr Browser (IE 11) ist leider zu alt und wird nicht mehr unterstützt.