20 onns Scola auta da pedagogia dal Grischun
La SAP dal Grischun è per mai...
Persunalitads da la scienza, da l'economia e da la politica da furmaziun preschentan differents aspects da la furmaziun da scolastas e scolasts e mussan co che la SAP dal Grischun vegn percepida en la publicitad.
Per mai è la SAP dal Grischun ina partenaria fitg impurtanta e fidada. La SAP dal Grischun ves jau sco instituziun da furmaziun e furmaziun cuntinuada orientada vers il futur per nossas persunas d’instrucziun. Ella accepta las novas sfidas sin il champ da furmaziun e realisescha quellas.
Per mai è la SAP dal Grischun la partenaria cumpetenta en connex cun dumondas davart la qualitad da la furmaziun.
Per mai è la SAP dal Grischun sin la dretga via ed è sa sviluppada ad in institut da scolaziun prezius per futuras scolastas e futurs scolasts. Gist en connex cun projects da MINT è la SAP dal Grischun dada en egl a moda fitg positiva.
Per mai è la SAP dal Grischun in’assicuranza per il futur – ella gida a garantir la scolaziun da noss uffants. Quai n’è betg ina simpla incumbensa.
Per mai è la SAP dal Grischun il lieu, nua ch’il fundament per la furmaziun da noss futur vegn mess e nua ch'il panorama da furmaziun dal Grischun vegn furmà a moda variada, creativa e progressiva.
La SAP dal Grischun resorta tras sia avertadad per novas sfidas sco la transfurmaziun digitala da la societad e las consequenzas per il mintgadi da scola. Oravant tut en la concepziun da l’instrucziun d’informatica sco er en la furmaziun ed en la furmaziun cuntinuada da las scolastas e dals scolasts da la scola populara en l’informatica ed en la didactica da l’informatica collavurain nus stretgamain. Questa collavuraziun tranter ina SAP ed ina SPF ha caracter exemplaric e vegn speranza a far scola – en il vair senn dal pled.
La SAP dal Grischun è ina scol’auta excellenta per las persunas d’instrucziun da damaun. Ultra da quai è ella per nus in partenari da rait cumpetent per la furmaziun e per la furmaziun cuntinuada e presta uschia ina contribuziun preziusa per la Svizra sco lieu da pensar e da lavurar en il futur. Cun ils camps da MINT che la SAP dal Grischun organisescha dapi 10 onns, collia ed entusiasmescha ella nossa generaziun giuvna da spezialistas e spezialists, las studentas ed ils students sco era nossas emprendistas e noss emprendists – ina vaira istorgia da success.
Per mai è la SAP dal Grischun l’instituziun che scolescha las persunas d’instrucziun sin mesira per noss chantun. La SAP dal Grischun è per mai in partenari fitg stimà per sviluppar vinavant las scolaziuns per l’admissiun a la furmaziun da scolastas e scolasts. Tenor mes manegiar è ella ina instituziun che integrescha e realisescha novs svilups.
Per mai stat la SAP dal Grischun en il servetsch da la furmaziun da la generaziun giuvna, cun il focus sin creativitad ed il svilup da las dimensiuns dal potenzial uman, cun il qual nagina tecnologia na po concurrenzar.
Per mai è la SAP dal Grischun il center da cumpetenza per la furmaziun e per la furmaziun cuntinuada da persunas d’instrucziun en noss chantun: plurilingua, al puls dal temp, persunala! Jau gratulesch al giubileum e ma legrel sin ina collavuraziun cuntinuanta e fritgaivla per nossas futuras scolastas e noss futurs scolasts.
Per mai è la SAP dal Grischun unica, perquai ch’ella porscha furmaziuns e furmaziuns cuntinuadas sco era perscrutaziun en tut las trais linguas chantunalas – tudestg, talian, rumantsch. Quai è unic ed ina contribuziun da gronda valur per la societad e la cultura dal Grischun.
Per mai è la SAP dal Grischun ina garanzia per l’element principal da la qualitad da la furmaziun: persunas d’instrucziun bain scoladas.
Per mai è la SAP dal Grischun in’instituziun averta, prospectiva ed existenziala per las scolaras ed ils scolars dal Grischun (ed era per auters). Per mai è la SAP dal Grischun verda-blaua-melna-... da tuttas colurs ed innovativa. Ella è per mai in’organisaziun spezialisada cumpetenta.
Nus interprendiders grischuns appreziain extraordinariamain la scolaziun qualifitgada da nossa generaziun giuvna. En quest connex han las persunas d’instrucziun ina rolla zunt impurtanta. La SAP dal Grischun metta mintga di il fundament per l’innovaziun e per la cumpetitivitad da noss manaschis ed è pia indispensabla per in futur cun success dal Grischun sco lieu d’abitar, da scolaziun e d’economia. Durant decennis mantegna l'EMS-CHEMIE ina stretga ed intensiva collavuraziun cun la SAP dal Grischun, organisescha camps da MINT annuals cun studentas e students da la SAP dal Grischun e scolaziuns da labor per las persunas d’instrucziun dal Grischun sin nossa plazza da lavur a Domat. Nus ans vulain engraziar cordialmain per quai ed ans legrain da cuntinuar questa collavuraziun cooperativa.
Per mai è la SAP dal Grischun ina scola auta multifara, innovativa e profilada. Ella è in model co ch'ins po respectar e tgirar pliras culturas linguisticas en in pajais pluriling. Cun l’engaschi da ses rectur, Gian-Paolo Curcio, en suprastanza ed en cumissiuns da la chombra SAP da swissuniversities, survegn la SAP dal Grischun actualmain ina reputaziun naziunala.
Per mai è la SAP dal Grischun ina ferma instituziun cun umans plain energia, creativs, averts e mirveglius. La Somedia stima fitg la grondiusa collavuraziun nuncumplitgada.
Per mai è la SAP dal Grischun ina scola auta innovativa e progressiva cun in profil brigliant areguard la diversitad linguistica dal territori alpin.
Per mai è la SAP dal Grischun ina instituziun da savida e da perscrutaziun ch’è relevanta per il chantun Grischun, in promotur da cumpetenzas per la trilinguitad da noss chantun, la spina dorsala dal lieu da furmaziun Grischun.
