Il sistem da furmaziun svizzer sco model da success vegn caracterisà da differents facturs. Sper la qualitad da las scolas publicas, gioga la pussaivladad da sa mover tranter ils differents stgalims da furmaziun ina rolla impurtanta. Concretamain èn quai la participaziun a differents programs da furmaziun, il passadi da la furmaziun professiunala a la furmaziun universitara u l'opziun da midar il job durant la carriera professiunala. La carriera da Gianmarco Corsetto è in grondius exempel per quai.
La famiglia da Gianmarco Corsetto deriva da l'Italia. Ses antenats han lavurà sin il bajetg, bab, basat ed aug eran tuts miradurs. Per Gianmarco pareva la via gia definida ed el è sa decidì per in emprendissadi da miradur, era perquai ch’el aveva in pau avunda da la scola. Betg ina tscherna definitiva, co ch’igl è sa mussà pli tard, dentant ina buna scola da la vita.
La scolaziun era pretensiusa: ina demananza groppa tranter ils collegas, il squitsch da prestaziun quotidian e da tutt'aura ordadora. Oz profitescha el da questas experientschas: perseveranza e resolutezza al gidan bler en sia lavur. Suenter avair terminà l'emprendissadi ha Gianmarco Corsetto midà patrun, quel ha sustegnì ses plans per ina furmaziun supplementara. Dueva el ir en direcziun polier u plitost manader da construcziun? Tuttenina ha el realisà quants auters champs professiunals ch’al stattan avert.
Sia derivanza sco uffant dad immigrants talians al ha servì sco impuls. El vuleva vegnir vinavant en la professiun, surpigliar responsabladad. Prest era naschida l'idea da far – suenter il curs preliminar a Schiers – il studi da bachelor sco persuna d'instrucziun per la scola primara a la SAP dal Grischun. Fin oz sa senta Gianmarco Corsetto da chasa en l'ambient da scola.
Durant otg onns sco persuna d'instrucziun a Landquart ha Corsetto rimnà experientschas preziusas. "Era sco scolast hai jau adina empruvà da vegnir vinavant. Ina giada sun jau stà responsabel per il stgalim, ina giada hai jau pudì surpigliar singulas incumbensas da la direcziun da scola. Era qua sun jau stà insacura conscient: jau vi far il proxim pass."
Da s’annunziar per ina plazza da manader da scola, ha era muntà da bandunar la zona da confort. La vista ch'el pudess adina turnar en sia anteriura lavur sco scolast al ha gidà da decider. Oz na stat el betg mal d’avair fatg quest pass ed è dapi trais onns manader da scola a Churwalden.
Sper sia rolla sco manader da scola, s'engascha Corsetto en la suprastanza da la Federaziun da mainascolas dal Grischun. El planisescha da cumenzar il studi da master svilup da la scola che la SAP dal Grischun porscha en collavuraziun cun autras scolas autas. Sa perfecziunar è in regal per Gianmarco Corsetto.