Giasts da la furmaziun, politica ed economia discuteschan davart las iniziativas
A la discussiun da podium èn las tschintg iniziativas vegnidas discutadas a moda animada e cumpetenta sut la direcziun da prof. dr. Gian-Paolo Curcio, rectur da la SAP dal Grischun. Al podium èn stads preschents
- Jon Domenic Parolini, cusseglier guvernativ dal chantun Grischun
- Sandra Locher Benguerel, cussegliera naziunala e cussegliera da la SAP dal Grischun
- dr. Barbara Fäh, rectura da la Scola auta interchantunala per pedagogia curativa Turitg (HfH)
- dr. Rudolf Minsch, schefeconom e vicepresident dad economiesuisse, manader politica economica & furmaziun
- dr. Juraj Hromkovic, professur per tecnologia d’infurmaziun e furmaziun a la SPF da Turitg
Las suandantas constataziuns da las participantas e dals participants da la discussiun permettan ina invista fragmentara en l'andament da la discussiun. Cusseglier guvernativ dr. Jon Domenic Parolini ha accentuà: "99,4% da las scolaras e dals scolars grischuns frequentan ina scola publica. Las scolas publicas resguardan fermamain ils basegns individuals da las scolaras e dals scolars cun differenziar ed individualisar.” Juraj Hromkovic n’è medemamain betg in ami dad extrems: "Per mai èsi impurtant che noss uffants emprendian d’agir endretg en la situaziun. Mintga uffant è talentà. La dumonda è be per tge." Rudolf Minsch ha fatg chapir che ultra da la matematica e da la lingua èn era dumandads future skills sco il pensar critic, la creativitad, la communicaziun e la collavuraziun. En quest connex na dastga l’incumbensa da selecziun da la scola en nagin cas ir a perder. Ultra da quai è vegnida tschentada la dumonda sch'il computer fiss la meglra persuna d'instrucziun e tgi che pudess lura avair in pled en chapitel en la scola dal futur resp. tgi che manass lura quella? Sandra Locher Benguerel ha punctuà en quest connex l'impurtanza da la persuna d'instrucziun en la stanza da scola: "Las persunas d'instrucziun restan adina las persunas decisivas en scola. Ellas surdattan responsabladad als uffants ed ellas promovan lur scolaras e lur scolars. Sche la persuna d'instrucziun è engaschada, surdat ella sia flomma automaticamain era als uffants." Barbara Fäh ha sa laschà inspirar da quai: "La scolaziun e la furmaziun supplementara da las persunas d'instrucziun han ina gronda impurtanza. Sche nus discurrin da la scola da l'avegnir, sche stuain nus era discurrer davart la furmaziun da las scolastas e dals scolasts da l'avegnir.
Tge scola e tge persunas d’instrucziun dal futur giavischan scolaras e scolars?
In pèr vuschs da scolaras e scolars èn vegnidas registradas ordavant e preschentadas cun agid d'in videoclip. Lorenzo, in scolar da la 5avla classa da Cuira ha declerà cun persvasiun: "Il roboter ta dat la dretga resposta, ma igl è pli bel d’avair ina endretga persuna en classa, perquai ch'ella ta gida ed jau poss confidar insatge ad ella e sai ch'ella na vegn a dir vinavant quai a nagin."
La scola pertutga nus tuts. La discussiun plain tensiun ha mussà che las respostas a las dumondas discutadas èn differentas. I na dat betg endretg ni fallà, mabain in dapli u damain.