Intervista a chaschun dal giubileum

“La dinamica en il champ dal svilup da las scolas autas vegn a s’augmentar”

Gian-Paolo Curcio, Vus essas dapi 9 onns rectur da la Scola auta da pedagogia dal Grischun. Tge èn stads da Vossa vista ils muments decisivs en l’istorgia da 20 onns da la Scola auta da pedagogia?

Da porscher la furmaziun da las magistras e dals magisters en il Grischun sco studi terziar, per correspunder al svilup svizzer vers la terziarisaziun da la furmaziun, è stà in pass impurtant collià cun ulteriurs process da refurma en il sectur da la furmaziun. Plinavant pens jau a la terziarisaziun interna ed externa ed al svilup da la scola auta en quest connex, a la via da la Scol’auta professiunala da pedagogia dal Grischun a la Scola auta da pedagogia sco institut autonom dal dretg public. Durant la perioda dal 2017 fin il 2023 avain nus cuntanschì in ulteriur term impurtant. En questa fasa è la SAP dal Grischun sa posiziunada sco scola auta accreditada instituziunalmain cun accents tematics sco la plurilinguitad, la scola en il territori alpin u la furmaziun en la midada digitala.

Avant tge sfidas futuras stat l’instituziun?

Quai che pertutga la furmaziun da persunas d’instrucziun a la Scola auta da pedagogia dal Grischun vegnan er l’onn 2035 purschids studis da bachelor e da master, furmaziuns cuntinuadas e supplementaras per persunas d’instrucziun, direcziuns da scola, autoritads da scola e docentas e docents sco era servetschs che resguardan ils basegns spezials dal chantun Grischun – en spezial la trilinguitad – e dals chantuns vischins. Ins sto partir dal fatg che la dinamica en il champ dal svilup da las scolas autas vegnia a s’augmentar sin il nivel instituziunal sco er sin il nivel naziunal areguard il tip da scola auta.

Entant che la profilaziun dal tip scola auta da pedagogia è gia succedida oz per gronda part, vegn il focus mess ils proxims onns spezialmain sin il dumber suffizient da persunas d’instrucziun cumpetentas, sin il svilup da las persunas d’instrucziun en il senn da spezialisaziuns respectivamain dad opziuns da carriera ed il gudogn d’enconuschientschas en il champ da la perscrutaziun d’instruir e d’emprender sco era da la didactica dal rom. La dinamica creschenta chaschuna ulteriuras pretensiuns a las scolas autas da pedagogia ed a lur svilup.

Co ademplis Vus questas pretensiuns?

Per che la Scola auta da pedagogia dal Grischun possia ademplir sia incumbensa e las pretensiuns che vegnan fatgas ad ella sco scola auta e per ch’ella possia realisar sias finamiras strategicas, ston las suandantas premissas esser ademplidas:

1. In’auta autonomia areguard la gestiun, la concepziun tematica ed il posiziunament strategic da la scola auta,

2. l’avertadad envers ils svilups e basegns da la societad da vart da l’instituziun e la prontezza da far frunt a las sfidas correspundentas cun la furmaziun e cun la perscrutaziun,

3. avunda resursas finanzialas, infrastructuralas, persunalas d’auta qualitad ed adequatas a las pretensiuns specificas.

Areguard la finanziaziun da la scola auta da pedagogia vegnan observadas dapli pretensiuns directivas sin il plaun naziunal e chantunal. Cun la proxima revisiun parziala da la Lescha chantunala davart las scolas autas e la perscrutaziun sto vegnir garantì che l’autonomia da las scolas autas e che las cumpetenzas da las singulas acturas e dals singuls acturs vegnian regladas a moda pli clera. Uschia è ina da las incumbensas centralas dal cussegl da la scola auta da s’engaschar per mantegnair l’autonomia da la scola auta, per l’avertadad envers svilups e per resursas suffizientas. Quai è impurtant, perquai che scolas autas autonomas, avertas e cun resursas suffizientas prestan ina contribuziun preziusa per la societad. Ultra da las resursas finanzialas e persunalas dovri era resursas infrastructuralas, e quai en ina dimensiun suffizienta ed en in lieu adattà per la Scola auta da pedagogia dal Grischun. L’infrastructura ha ina rolla pli e pli impurtanta per las scolas autas quai che pertutga l’instrucziun e la perscrutaziun en ils roms e champs ch’èn relevants per la furmaziun da las scolastas e dals scolasts.

Il motto da l’onn da giubileum sa cloma “Ina furmaziun d’auta qualitad per tuts”. Tge è manegià cun quai?

La furmaziun e la furmaziun cuntinuada da las persunas d’instrucziun han ina gronda relevanza sociala. Cun lur lavur gidan ellas a concepir la societad da damaun. Instruir è dapli che mo intermediar savida. Las persunas d’instrucziun insceneschan occasiuns d’emprender (oppurtunities to learn); en quellas vegn promovì il svilup da las cumpetenzas specificas e transversalas, vegnan intermediadas normas e valurs e sustegnì il svilup persunal da las giuvnas e dals giuvens. En quest senn contribueschan las persunas d’instrucziun considerablamain da porscher e da cuntanscher la finamira da las Naziuns unidas che prevesa ina furmaziun d’auta qualitad per tuts (Sustainable Development Goal SDG).

Tge impurtanza ha ina furmaziun d’auta qualitad per la SAP dal Grischun?

Nus ans engaschain per cuntanscher las finamiras da l’agenda 2030 da las Naziuns unidas ed ans engaschain tranter auter per ina furmaziun d’auta qualitad per tuts, perquai che las persunas d’instrucziun influenzeschan nossas generaziuns futuras. Ellas preparan las giuvnas ed ils giuvens sin il mund da damaun cun sensibilisar e scolar els per las sfidas socialas, ecologicas ed economicas.

Per la perioda da strategia 2021 fin 2024, sa concentrescha la SAP dal Grischun sin ils suandants quatter Sustainable Development Gols:

• Furmaziun d’auta qualitad (4)
• Egualitad dals genders (5)
• Consum e producziun responsabla (12)
• Mesiras per proteger il clima (13)
  
  

Questas ed ulteriuras finamiras èn ina part da nossa strategia da persistenza. Cun agid da projects concrets sco l’agid per far ils pensums u cun differentas activitads durant il di da las scolas autas mussain nus a las persunas d’instrucziun futuras cun la metoda d’Inside Out sa basond sin ils Sustainable Development Goals, co ch’ellas pon sustegnair in svilup persistent cun pitschnas acziuns. En quest connex èn impurtantas las experientschas concretas, il rinforzament da la percepziun individuala da l’autoefficacitad ed il svilup ad ina tenuta positiva envers in svilup persistent.

Tge As giavischais Vus per il futur?

Il focus principal da las scolas autas da pedagogia èn ils process da l’emprender e da l’instrucziun sco er ils svilups socials correspundents . En consequenza stattan ils umans en il center, e quai tant las studentas ed ils students sco era las collavuraturas ed ils collavuraturs. La recrutaziun da persunal ed il mantegniment dal persunal han pia la prioritad la pli auta. Da recrutar docentas e docents en ils roms respectivs, che han in diplom da master, in diplom per il stgalim en mira, enconuschientschas da la didactica da la scola auta sco er da las linguas chantunalas necessarias, è mintgatant ina gronda sfida per la Scola auta da pedagogia dal Grischun. Uschia è il mantegniment d’ina gronda attractivitad da la plazza da lavur, il svilup persunal a l’intern da la scola auta adattà als basegns da las collavuraturas e dals collavuraturs, sco era la tgira da la cultura da lavur interna basada sin valurs da gronda impurtanza per las scolas autas. La finamira che fa part dal program da la regenza 2021 fin 2024 areguard il posiziunament dal chantun Grischun sco patruna attractiva va en la dretga direcziun. Per che tut quai possia reussir, duvrain nus er en l’avegnir autonomia, avertadad e resursas.

Sin tge As legrais Vus persunalmain l’onn 2023?

Jau ma legrel fitg da viver e da festivar il giubileum ensemen cun nossas collavuraturas e noss collavuraturs sco era cun nossas studentas e noss students. Senza els na fiss la SAP dal Grischun betg quai ch’ella è oz. Il giubileum da 20 onns vegn festivà durant l’entir onn cun differentas acziuns. Per quest intent vegnan organisads inscunters ed i vegn engrazià a la populaziun per la confidenza ed il sustegn demussà envers nus.