In ferm sistem da furmaziun public è ina da las pitgas fundamentalas da societads democraticas. Ma il sistem da furmaziun n'è betg ina structura fixa. La dumonda urgenta è perquai: En tge direcziun duai noss sistem da furmaziun sa sviluppar vinavant en l’avegnir? Questa dumonda è stada en il center da l'exposiziun ambulanta "Schule. Experiment Zukunft" dal Museum da scola da Berna. Il favrer 2023 èn 170 represchentantas e represchentants da la politica, da l'economia e da la furmaziun sa confruntads cun questa dumonda en ina discussiun da diversas perspectivas.
Glindesdi saira, ils 13 da favrer 2023, han 170 persunas, tranter quellas bleras deputadas e blers deputads, chattà la via a la Scalärastrasse 17. Prof. dr. Gian-Paolo Curcio, rectur da la SAP dal Grischun, ha beneventà ils giasts cun ils suandants pleds: "Las scolas e lur persunas d'instrucziun èn impurtantas per nossa societad. Il champ d'incumbensas da las persunas d'instrucziun surpassa per bler l'intermediaziun da savida. Las persunas d'instrucziun insceneschan pussaivladads d'emprender, en las qualas vegnan promovidas il svilup da las cumpetenzas dal rom e da las cumpetenzas transversalas ed en las qualas vegnan intermediadas normas e valurs per uschia sustegnair la furmaziun da la persunalitad dad umans giuvens. Las persunas d'instrucziun surpiglian cun lur agir professiunal responsabladad per la societad. Cun lur lavur concepeschan ellas noss futur. Consequentamain han las persunas d'instrucziun e las scolas ina gronda relevanza sociala.” En numerus circuls d’experts e d’interess vegnan manads discurs davart l'avegnir dal sistem da furmaziun. Quai che manca dentant è ina discussiun publica viva e fundamentala. E precis quai è stà il punct da partenza per l'occurrenza.
Il professer emerità Hans-Ulrich Grunder, confundatur da l'exposiziun "Schule. Experiment Zukunft" ha explitgà las otg dumondas da basa sco era tschintg iniziativas ed ha uschia pussibilità als giasts ina sperta survista. Las iniziativas èn da chapir sco gieus da patratgs provocants. Ellas servan sco basa da discussiun e na pon betg vegnir distinguidas cleramain ina da l'autra.
A la discussiun da podium èn las tschintg iniziativas vegnidas discutadas a moda animada e cumpetenta sut la direcziun da prof. dr. Gian-Paolo Curcio, rectur da la SAP dal Grischun. Al podium èn stads preschents
Las suandantas constataziuns da las participantas e dals participants da la discussiun permettan ina invista fragmentara en l'andament da la discussiun. Cusseglier guvernativ dr. Jon Domenic Parolini ha accentuà: "99,4% da las scolaras e dals scolars grischuns frequentan ina scola publica. Las scolas publicas resguardan fermamain ils basegns individuals da las scolaras e dals scolars cun differenziar ed individualisar.” Juraj Hromkovic n’è medemamain betg in ami dad extrems: "Per mai èsi impurtant che noss uffants emprendian d’agir endretg en la situaziun. Mintga uffant è talentà. La dumonda è be per tge." Rudolf Minsch ha fatg chapir che ultra da la matematica e da la lingua èn era dumandads future skills sco il pensar critic, la creativitad, la communicaziun e la collavuraziun. En quest connex na dastga l’incumbensa da selecziun da la scola en nagin cas ir a perder. Ultra da quai è vegnida tschentada la dumonda sch'il computer fiss la meglra persuna d'instrucziun e tgi che pudess lura avair in pled en chapitel en la scola dal futur resp. tgi che manass lura quella? Sandra Locher Benguerel ha punctuà en quest connex l'impurtanza da la persuna d'instrucziun en la stanza da scola: "Las persunas d'instrucziun restan adina las persunas decisivas en scola. Ellas surdattan responsabladad als uffants ed ellas promovan lur scolaras e lur scolars. Sche la persuna d'instrucziun è engaschada, surdat ella sia flomma automaticamain era als uffants." Barbara Fäh ha sa laschà inspirar da quai: "La scolaziun e la furmaziun supplementara da las persunas d'instrucziun han ina gronda impurtanza. Sche nus discurrin da la scola da l'avegnir, sche stuain nus era discurrer davart la furmaziun da las scolastas e dals scolasts da l'avegnir.
In pèr vuschs da scolaras e scolars èn vegnidas registradas ordavant e preschentadas cun agid d'in videoclip. Lorenzo, in scolar da la 5avla classa da Cuira ha declerà cun persvasiun: "Il roboter ta dat la dretga resposta, ma igl è pli bel d’avair ina endretga persuna en classa, perquai ch'ella ta gida ed jau poss confidar insatge ad ella e sai ch'ella na vegn a dir vinavant quai a nagin."
La scola pertutga nus tuts. La discussiun plain tensiun ha mussà che las respostas a las dumondas discutadas èn differentas. I na dat betg endretg ni fallà, mabain in dapli u damain.
Igl è nairas uras per ina digitalisaziun consequenta da las scolas. Il potenzial da la revoluziun digitala per emprender n'è fin ussa anc strusch vegnì utilisà. I vegn emprendì vinavant cun ils meds dal 20avel tschientaner e per il 20avel tschientaner.
La scola dad oz è in product dal 19avel tschientaner e da la revoluziun industriala. Nus stuain finalmain adattar noss sistem da scola a las premissas midadas ed al mund da lavur da l'avegnir. La scola dal 21avel tschientaner dovra en emprima lingia dapli individualitad e creativitad!
Naginas ulteriuras refurmas da la furmaziun irrealisticas! Ils uffants n'emprendan nagut pli endretg, la relaziun cun la pratica va a perder ed ils privels dal diever da medias digitalas vegnan sutvalitads. I dovra urgentamain in’appreziaziun da las metodas d'educaziun e da furmaziun tradiziunalas.
Per las sfidas dal 21avel tschientaner duvrain nus in ferm sistem da furmaziun public. En vista ad in mund globalisà, a l'inegualitad creschenta ed a la midada dal clima na dastgain nus betg periclitar questa pitga da nossa societad democratica.
Finì cun il monopol da furmaziun statal! Ina scola che satisfa a tut ils basegns è ina illusiun. Empè da quai pretendain nus in sistem da scola privatisà cun numerusas furmas da scola differentas.
Diskurse über die Zukunft des Bildungswesens werden in zahlreichen Fach- und Interessenkreisen geführt. Was jedoch fehlt, ist eine lebhafte und grundlegende öffentliche Diskussion. Und genau hier setzt die Ausstellung «Schule. Experiment Zukunft» an.
ulteriuras infurmaziuns
Der Lehrgang besteht aus vier Profilen: MINT & Making, Medien & Digitalität, Programmieren und Pädagogischer ICT-Support.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.
