BLERAS ANNUNZIAS A LA SAP DAL GRISCHUN

Persunas d’instrucziun per la scolina fin a las scolas da maturitad

Il rectur prof. dr. Gian-Paolo Curcio sa legra che tantas persunas vulan daventar scolastas e scolasts e s’interesseschan per in studi a la SAP dal Grischun: „L’incumbensa da la Scola auta da pedagogia cumpiglia tranter auter la furmaziun e la furmaziun cuntinuada da persunas d’instrucziun. Ils davos dus onns èn ils studis da bachelor ed il studis da master vegnids surlavurads e la purschida da studis è vegnida engrondida. Igl è allegraivel che nus pudain prestar ­ – en connex cun la situaziun precara da recrutaziun da persunas d’instrucziun en il Grischun sco er en ils chantuns vischins – ina contribuziun essenziala per pudair cuvrir il grond basegn en l’avegnir.“

150 studentas e students èn s’annunziads per il studi scola primara (1. fin 6. classa) a temp cumplain, 46 cun pliras linguas da scola u cun lingua da scola talian. Quai correspunda ad in augment da 25% en cumparegliaziun cun l’onn precedent. 43 studentas e students èn s’annunziads per il studi scolina e scola primara (1. fin 2. classa); quai èn bunamain tants sco l’onn passà respectivamain duas fin trais giadas uschè blers sco las ultimas annadas dal studi da scolina. 20 studentas e students èn s’annunziads per il studi a temp parzial da la scola primara (1. fin 6. classa). Quest studi reparta il svilup da cumpetenzas sin quatter onns ed ils dis da preschientscha sa restrenschan sin glindesdi fin mesemna. Era quai correspunda ad in augment da 25% en cumparegliaziun cun l’onn precedent.

Il rectur sa legra spezialmain da l’augment sin il stgalim secundar, surtut perquai che quests studis èn vegnids sviluppads da nov ed introducids l’onn 2022: “Ils studis dal stgalim secundar I ed il studi cumbinà dal stgalim secundar I/scolas da maturitad sa drizzan a persunas che han gia in diplom da bachelor u da master en in u plirs roms da scola. Cun questa nova purschida da studi pudain nus pledentar ina ulteriura gruppa da persunas e gidar considerablamain da reducir la tensiun pertutgant la situaziun da recrutaziun. Il settember 2023 cumenzan 22 persunas cun in diplom professiunal il studi stgalim secundar u il studi cumbinà dal stgalim secundar e scolas da maturitad; en quests studis a temp parzial da trais onns è il dumber d’annunzias s’augmentà per passa 60% en cumparegliaziun cun l’emprima realisaziun. Plinavant vegnan 14 ulteriuras persunas d’instrucziun per la scola primara a sa scolar vinavant a persunas d’instrucziun per la scola secundara. Quest studi porscha la SAP dal Grischun en collavuraziun cun la SAP da Son Gagl.

Da la scola auta da pedagogia pitschna a la scola auta da pedagogia mesauna

Sche la SAP dal Grischun po tegnair ils dumbers d’annunzia fin l’atun, vegn ella a scolar il di da referenza dals 15 d’october 2023 per l’emprima giada passa 500 studentas e students ed uschia avanzar en il sectur da las scolas autas da pedagogia mesaunas. Betg integrads en questas cifras èn las studentas ed ils students dals dus studis da master „Svilup da scola“ e „Pedagogia curativa da scola“. Il studi „Pedagogia curativa da scola” porscha la SAP dal Grischun era vinavant mintg’onn en cooperaziun cun la scola auta da pedagogia curativa da Turitg. Era sch’il dumber d’annunzias po anc sa midar fin l’entschatta dal studi il settember 2023, pretendan quests gronds dumbers d’annunzia gia uss differentas mesiras areguard il persunal, l’infrastructura e las finanzas.

La SAP dal Grischun s’allegra dals svilups positivs e da las sfidas che spetgan. "En emprima lingia vai persuenter da scolar avunda persunas d’instrucziun per la scola primara e per ils chantuns vischins. Per las sfidas che stattan en connex cun il grond dumber da studentas e students vegnin nus a chattar en collavuraziun cun la regenza e cun l’administraziun chantunala soluziuns solidas e pragmaticas”, uschia il rectur Gian-Paolo Curcio.