Sa participar:

Enquista davart la diversitad dal rumantsch 

Tut las persunas che discurran rumantsch – independentamain da lur vegliadetgna e dal lieu da domicil – èn envidadas da sa participar a la retschertga. Era persunas che han emprendì rumantsch pon sa participar. Tgi che discurra plirs idioms, po emplenir il questiunari per mintga idiom separadamain.

Las dumondas han la finamira da relevar il diever da la lingua quotidiana. Per il solit datti pliras variantas da tscherner. Per exempel la varianta che correspunda il pli cun l'atgna pronunzia d'in tschert pled. Tar intginas dumondas vai per numnar chaussas sin maletgs ni tge variantas ch’èn usitadas en il mintgadi.

Ils ultims onns èn vegnids realisads differents projects davart differentas linguas e dialects che han la finamira d'intercurir la lingua en il spazi geografic e da documentar il stadi linguistic actual sin chartas. Quellas chartas vegnan lura reunidas en atlas linguistics. Avant curt è per exaimpel vegnì sviluppà in atlas linguistic davart ils dialects svizzers tudestgs (www.dialektatlas.ch) – pia motiv avunda per iniziar in tal project era per il rumantsch.

Il studi preliminar actual duai stgaffir ina basa da datas solida per dumandar ina finanziaziun dal Fondo naziunal svizzer. En cas d'ina decisiun positiva, vegn il catalog da dumondas extendì ed ins intervistescha probandas e probands da differents lieus dal Grischun rumantsch. La finamira dal project vegn ad esser da crear in atlas linguistic digital, accessibel al public. Ils resultats da la retschertga avant maun vegnan duvrads per publicaziuns scientificas, intgins fenomens interessants vegnan dentant era cartads e rendids accessibels per il public.

Gia la fin dal 19avel tschientaner èn vegnidas fatgas emprimas retschertgas per documentar ils dialects, sche pussaivel en versiuns fitg oriundas. Perquai ch’ins vuleva relevar ina moda da pledar uschè «autentica» ed originara sco pussaivel, han ins interrogà cunzunt umens pli vegls che lavuravan en l’agricultura e ch’avevan passentà lur entira vita en la medema vischnanca. Anc oz dovran linguist:as questas documentaziuns voluminusas per chapir il svilup dal linguatg. En projects da perscrutaziun actuals na vegnan però betg mo interrogadas specificas gruppas da la populaziun. La finamira è era da documentar la lingua da mintgadi en tut sias fassettas e da differentas gruppas socialas.

Il project vegn manà da la professura da rumantsch e didactica da rumantsch da la Scola auta da pedagogia dal Grischun e da la professura da rumantsch da l’universitad da Friburg. Las duas professuras colliescha l’interess communabel per dumondas linguisticas.