Servetschs

Svilup da la scola e da l'instrucziun

Nus accumpagnain e sustegnain scolas en process dal svilup da la scola e da l'instrucziun. Grazia a noss accumpagnament dal process pon ils projects da svilup actuals vegnir planisads e realisads cun cleras finamiras en stretga collavuraziun cun la direcziun da la scola e cun il team da scola. Il cuntegn dal svilup po resultar dad in'evaluaziun a l'intern da la scola u ordaifer la scola resp. d'ina valitaziun da la scola. Ensemen cun la scola vegnan fixadas finamiras per il process da svilup. Ils cuntegns pussaivels cuvran in grond spectrum da temas: l'elavuraziun d'in profil da la pedagogia, temas che pertutgan l'instrucziun, la collavuraziun en il champ da scola, la scola che promova la sanadad e bler auter pon star en il focus.

Per concepir process da midada èsi indispensabel d'avair in management da midadas adattà che sa basa sin in plan da project ch'è vegnì elavurà cun quità e che serva a las finamiras da svilup da la scola. Per pudair resguardar uschè intenziunà sco pussaivel las resursas ed ils basegns avant maun a la scola respectiva, po nossa contribuziun esser fitg variada. Quai po esser ina cussegliaziun da la direcziun da la scola davos las culissas, ina cussegliaziun da gruppas directivas u era la lavur directa cun teams da scola en differents formats da cussegliaziun e da furmaziun. Uschia pon per exempel era vegnir planisadas furmaziuns supplementaras entaifer la scola en in process da svilup.

Cun accumpagnar il process èsi impurtant per la SAP dal Grischun da rinforzar las cumpetenzas da las scolas en connex cun midadas ed innovaziuns e da prender per mauns las sfidas da maniera orientada a la soluziun.