Wissenschaftliche Mitarbeiterin III, als Leiterin MINT
Surdada da la clav a la Scola auta da pedagogia dal Grischun
En il rom da la surdada da la clav dad ier a la Scola auta da pedagogia dal Grischun ha il rectur partent, prof. dr. Gian-Paolo Curcio, returnà cun ils pleds in pau adattads da la chanzun dals Beatles «I say goodbye and you say hello» la responsabladad per la SAP dal Grischun al president dal cussegl da la scola auta, dr. Hans Peter Märchy. Quel ha surdà la responsabladad da la SAP dal Grischun cun ils dretgs e las obligaziuns respectivas a ses successur dr. Reto Givel.
La presidenta dal Cussegl grond Silvia Hofmann ha prendì cumià dal rectur partent, prof. dr. Gian-Paolo Curcio en num dal Cussegl grond cun ils pleds: «Esser rectur n'è betg x-ina professiun, mabain ina clamada. E quai has ti vivì avant! Ti has manà la scola auta da pedagogia cun corp ed olma e bler engaschi persunal. Ti has nizzegià las pussaivladads da concepir la SAP ed es adina puspè t’engaschà per ils giavischs da las scolas autas en il Cussegl grond durant ils ultims onns. Quai adina da moda e maniera fitg clera, empernaivla, constructiva ed era professiunala sco er en blers discurs persunals. Ti has adina giudì gronda fidanza en quest connex – quai has ti elavurà cun tes grond engaschi e tias enconuschientschas.»
Il president da la Regenza, dr. Jon Domenic Parolini, ha dà sin via ils suandants pleds a Gian-Paolo Curcio, il rectur designà da la SAP dal Grischun: «Ti has contribuì ina part essenziala al svilup da la SAP dal Grischun ad ina scola auta moderna che ha success, ti has furmà l’instituziun cun tias ideas e tias innovaziuns e – ti has simplamain fatg e prendì per mauns. En num da la regenza dal chantun Grischun engraziel jau a tai per tia professiunalitad, tes engaschi nunstanclentaivel, per tes vast orizont, per tia moda e maniera orientada a la soluziun cun ina clera finamira e per tia bainvulientscha. Engraziel era per la buna collavuraziun cun la regenza grischuna, cun las scolas autas, cun las scolas medias, cun la scola populara e cun auters partenaris. Nus ans allegrain che ti lavuras vinavant per noss chantun.»
Il president dal cussegl da la scola auta da la SAP dal Grischun, dr. Hans Peter Märchy, ha engrazià al rectur partent e giavischà a ses successur, dr. Reto Givel, bun success ed in bun maun. El sa legria ensemen cun las commembras ed ils commembers dal cussegl da scola sin la collavuraziun. Dr. Reto Givel ha suttastritgà en sia prospectiva l’impurtanza e la muntada da la furmaziun da las scolastas e dals scolasts.
Ils «Junvögel» han enramà musicalmain la surdada da la clav. Lur chanzun cumponida aposta ha regurdà als davos quattordesch onns cun il rectur partent da la Scola auta da pedagogia dal Grischun ed è in engraziament per il bel e prosperaivel temp communabel.
Contact